ཆོས་ཐུན་སྔ་མ་གྲུབ་ནས་བར་གསེང་གི་རྗེས་སུ། སླར་ཡང་༸སྐྱབས་མགོན་རྒྱལ་བའི་རྒྱལ་ཚབ་མཆོག་ནས་ཕྱག་ཆེན་སྨོན་ལམ་གྱི་བཀའ་ཁྲིད་ཆོས་ཐུན་སྔ་མའི་མཚམས་ནས་མུ་མཐུད་དེ་གསུང་དོན། རྣམ་རྟོག་གི་སྙིང་རྗེ་ནི་སྐྱོན་གྱིས་གོས་པ་ཡིན་པ་དང་། གནས་ལུགས་ཀྱི་སྙིང་རྗེ་ནི་རྟོག་པ་མེད་པས་ནམ་ཡང་སྐྱོན་གྱིས་གོས་པ་མེད་པ་སོགས་སྙིང་རྗེའི་བཀའ་ཁྲིད་ཞིབ་རྒྱས་གསུངས་རྗེས། དད་ལྡན་སློབ་ཚོགས་ཡོངས་ལ་སྐར་མ་འགའ་གནས་ལུགས་ཕྱག་རྒྱ་ཆེན་པོའི་ངང་ནས་རྟོག་པ་མེད་པའི་སྙིང་རྗེ་སྒོམ་དགོས་པའི་བཀའ་སྩལ། དེ་བཞིན་སེར་སྐྱ་ཕོ་མོ་ཡོངས་ནས་ཀྱང་རང་རང་གི་བཞུགས་གནས་སུ་སྐར་མ་འགའ་ཤས་སྒོམ་ལ་བརྩོན། 

དེའི་རྗེས་སུ་ཕྱག་ཆེན་སྨོན་ལམ་གྱི་རྩ་བར། བཟོད་མེད་སྙིང་རྗེའི་རྩལ་ཡང་མ་འགགས་པའི། །བརྩེ་དུས་ངོ་བོ་སྟོང་དོན་རྗེན་པར་ཤར། །ཟུང་འཇུག་གོལ་ས་བྲལ་བའི་ལམ་མཆོག་འདི། །འབྲལ་མེད་ཉིན་མཚན་ཀུན་ཏུ་བསྒོམ་པར་ཤོག  །ཅེས་པའི་སྐབས་སུ་ཕྱག་རྒྱ་ཆེན་པོ་ཐུན་མོང་མ་ཡིན་པར་གནས་ལུགས་འོད་གསལ་བ་དེ་རང་སྙིང་རྗེ་ཡིན་ཞིང་། བརྩེ་དུས་སྟོང་པར་མི་རྟོགས་པར་དངོས་པོར་ཞེན་ན་གནས་ལུགས་ཕྱག་ཆེན་སྒོམ་པའི་བར་ཆད་དུ་འགྱུར་བ་དང་། བརྩེ་བ་དང་སྟོང་པ་གཉིས་ཟུང་འཇུག་ཏུ་སྒོམ་ན་སྒོམ་ཆེན་ལམ་མ་ནོར་བ་ཡིན་པ་དང་།  དེ་བཞིན་སྟོན་པ་བཅོམ་ལྡན་འདས་ཀྱིས་ཀྱང་སྙིང་རྗེ་དེ་ཉིད་འགྲོ་བའི་བློ་དང་འཚམས་པར་རིམ་བཞིན་བསྟན་པའི་ཚུལ། སྙིང་རྗེ་མཆོག་ཏུ་སྒོམ་ན་གཟུགས་སོགས་ཀྱང་སྙིང་རྗེའི་རང་བཞིན་དུ་མཐོང་བར་གསུངས། དེའི་རྗེས་སུའང་ཆོས་ཞུ་བ་ཀུན་ལ་ལུས་སེམས་དབྱེར་མེད་ཀྱི་སྒོམ་རྒྱབ་དགོས་པའི་བཀའ་སྩལ་ཞིང་། སླར་ཡང་ཆོས་ཞུ་བ་ཡོངས་ནས་སྐར་ཆ་འགའ་ལུས་སེམས་དབྱེར་མེད་ཀྱི་སྒོམ་རྒྱབ་གནང་མཛད།  

མ་ཟད་གསང་སྔགས་ཀྱི་ནང་དུ་ཁྲོ་བོའི་ལྷ་རྣམས་རྣམ་པ་ཁྲོ་བོར་བསྟན་དགོས་པའི་རྒྱུ་མཚན་གནད་བསྡུས་ཞིག་གསུངས་པ་འདི་ལྟར། "འཕགས་པ་ཕྱག་ན་རྡོ་རྗེ་ལ་སོགས་པའི་ཁྲོ་བོའི་ལྷ་རྣམས་ཀྱང་ཐུགས་བྱམས་པ་ལས་གཡོ་བ་མེད། རྣམ་པ་དེ་ལྟར་བསྟན་དགོས་པའི་རྒྱུ་མཚན་ནི། གདུལ་བྱ་གདུག་པ་ཅན་རྣམས་འདུལ་བའི་སླད་དུ་ཡིན། དེ་ཡང་གདུལ་བྱ་གདུག་པ་ཅན་རྣམས་ནི་རང་བཞིན་གྱིས་ཞི་བ་ལ་མི་དགའ་ཞིང་ཁྲོ་བོ་ལ་དགའ་བས་ན་ལྷ་དེ་དག་རྣམས་ཀྱང་གདུལ་བྱ་དེ་དག་དང་འདྲ་བ་ཞིག་ཏུ་སྤྲུལ་པ་ཡིན། དེ་བཞིན་མགོན་པོ་བེར་ནག་དང་དམ་ཅན་ལ་སོགས་རྣམས་ཀྱང་ཐུགས་བྱམས་པ་ལས་གཡོ་བ་མེད་པ་དེ་ལྟར་ཡིན། རང་ཉིད་ཀྱང་ཁྲོ་བོའི་ལྷ་དེ་དག་སྒོམ་ཚེ་མ་འོངས་པར་གདུལ་བྱ་གདུག་པ་ཅན་རྣམས་ཀྱི་དོན་བྱེད་ནུས་པར་ཤོག་ཅེས་སྨོན་ལམ་བཏབ་དགོས" ཞེས་གསུངས་སོ།  །

དེ་རྗེས་སྒོམ་པའི་འབྲས་བུ་བསྟན་པའི་རྩ་བར།  སྒོམ་སྟོབས་ལས་བྱུང་སྤྱན་དང་མངོན་ཤེས་དང༌། །སེམས་ཅན་སྨིན་བྱས་སངས་རྒྱས་ཞིང་རབ་སྦྱངས། །སངས་རྒྱས་ཆོས་རྣམས་འགྲུབ་པའི་སྨོན་ལམ་རྫོགས། །རྫོགས་སྨིན་སྦྱངས་གསུམ་མཐར་ཕྱིན་སངས་རྒྱས་ཤོག །ཅེས་པའི་སྐབས་སུ་འབྲས་བུ་སྤྱན་ལྔ་དང་མངོན་ཤེས་ལྔའི་སྐོར་ཤིན་ཏུ་རྒྱས་པར་གསུངས། 

ཆོས་ཀྱི་སྤྱན་གྱི་སྐོར་གསུངས་ཚེ་དུས་དེང་སང་དམ་པའི་ཆོས་འཆད་པའི་སྐབས་རིགས་གཙོ་བོ་མིན་པར་མོས་པ་གཙོ་བོར་བྱ་བ་ཡིན་ཞེས་གསུངས་པ་འདི་ལྟར། "སྔོན་ཆོས་བཤད་ཚེ་རིགས་ལ་བརྟག་ནས་ཆོས་གསུངས། དེང་སང་མོས་པ་ལ་བརྟེན་ནས་གཙོ་བོར་ཆོས་གསུངས་ཀྱི་ཡོད། དཔེར་ན། གནའ་སྔ་མོ་དབང་བསྐུར་དུས་རིགས་ལ་བརྟག་ནས་དབང་བསྐུར་ཞིང་ཆོས་གསུངས། དུས་དིང་སང་མོས་པ་ཙམ་གཙོ་བོར་བྱས་ནས་དབང་སོགས་བསྐུར་གྱི་ཡོད།" ཅེས་གསུངས་སོ། ། 

དེ་བཞིན་མངོན་ཤེས་ལྔའི་སྐོར་བཀའ་ཁྲིད་གནང་བའི་སྐབས་སྔོན་གནས་རྗེས་སུ་དྲན་པ་ནི། སྔོན་སངས་རྒྱས་ཀྱིས་སྐྱེས་རབས་རྣམས་སུ་སྟོན་པ་ཉིད་དང་། མཆོག་ཟུང་གཉིས་ལ་སོགས་པའི་བསྐལ་པ་ཆེས་མང་པོའི་སྔོན་གྱི་སྐྱེས་རབས་གསུང་བ་བཞིན་དུ། ཚེ་སྔོན་མ་རྣམས་སུ་རང་གཞན་རྣམས་ཀྱི་སྐྱེ་བ་ཇི་ལྟར་ཡིན་པ་ཤེས་པ་དེ་ཡིན་པ་དང་། ཟག་པ་ཟད་པའི་མངོན་ཤེས་ནི། རྗེ་བཙུན་མར་པ་དང་མི་ལ་སོགས་པ་རྣམས་ཀྱིས་སྒྲིབ་པ་དག་མ་དག་མཁྱེན་པ་ལྟ་བུ། སེམས་ཅན་གྱི་རྒྱུད་ལ་སྒྲིབ་པ་ཇི་ཙམ་ཟད་པ་དེ་ཉིད་མཁྱེན་པ་ཡིན་ཞེས་གསུངས། 

ཡང་འགྲོ་བ་སེམས་ཅན་རྣམས་ཇི་ལྟར་སྨིན་པ། བདག་གཞན་གཉིས་ཀ་སྨིན་དགོས་པ། སྨིན་པའི་རྟགས་རྣམས་ཤིན་ཏུ་གོ་བདེ་བའི་ངང་ནས་གསུངས་པ་འདི་ལྟར། "སེམས་ཅན་སྨིན་ཞེས་པ་ནི། དཔེར་ན། ཤིང་འབྲས་སྨིན་ཞེས་པའི་སྐབས་ཤིང་འབྲས་རྣམས་བཟའ་ཆོག་ཆོག་ཏུ་བྱས་པ་བཞིན་ཡིན། དེ་ཡང་སྔོན་སྟོན་པ་བཅོམ་ལྡན་འདས་སློབ་པ་ལམ་ཞུགས་ཀྱི་གནས་སྐབས་སུ་གཞན་འབུ་སྲིན་ལ་སོགས་པའི་དུད་འགྲོ་རྣམས་ལ་རང་གི་སྲོག་ལ་མ་ལྟོས་པར་སྦྱིན་པ་སྦྱིན་པ་ལ་སོགས་གནང་བ་ལ་བརྟེན་ནས། མཐར་རང་ཉིད་སངས་རྒྱས་པའི་ཚེ་དེ་དག་རྣམས་ལ་ཆོས་གསུངས་པ་ཙམ་གྱིས་དགྲ་བཅོམ་པ་ཐོབ་པ་ལྟ་བུ་ཡིན། དེ་བཞིན་སྨིན་པ་ལ་རང་དང་གཞན་གཉིས་ཀ་སྨིན་དགོས། དེ་ཡང་དང་པོ་རང་ཉིད་སྨིན་པ་ཞིག་དགོས་ངེས་ཡིན། རང་ཉིད་སྨིན་པའི་རྟགས་ལ་ཆོས་བསྒྲུབ་རྒྱུ་དང་། བླ་མ་བསྟེན་པ་སོགས་ལ་ཡིད་གཏིང་ནས་དགའ་བ་སྐྱེས་པ་ཞིག་འོང་། གང་ཟག་འགའ་ཞིག་བླ་མའི་སྐུ་མདུན་དུ་བསྡད་ཀྱང་ཆོས་དང་། བླ་མ་ལ་ཡིད་མི་དགའ་བར་འགྱུར་འགྲོ་བ་ཡང་ཡོད། དེ་ལྟ་བུ་འབྱུང་ན་མ་སྨིན་པ་ཡིན། བསམ་གྱིས་མི་ཁྱབ་པའི་ཆོས་བཞི་རྣམས་རྟོགས་མི་ནུས་ཀྱང་ཞེ་ཐག་པ་ནས་ཡིད་ཆེས་ཀྱང་སྨིན་པའི་རྟགས་ཡིན་ཞེས་དང་། ཡང་དང་པོ་རང་རྒྱུད་སྨིན་ནས་ད་གཟོད་གཞན་སྨིན་ནུས་པ་བྱ་དགོས།"ཞེས་གསུངས་སོ། །

དེ་བཞིན་སྨིན་པ་ལ་ཉོན་མོངས་པ་སྤངས་པའི་སྒོ་ནས་སྨིན་པ། སྙིང་རྗེས་སྨིན་པ།  རིགས་པས་སྨིན་པ། བྲལ་བས་སྨིན་པ། ཡོངས་སུ་སྨིན་པ། རྟོགས་པས་སྨིན་པའི་ཚུལ་ལ་བཀའ་ཁྲིད་ཟབ་རྒྱས་གནང་། 

དེ་ནས་ཞིང་ཡོངས་སུ་སྦྱང་བའི་སྐོར་ལ་བཀའ་ཆོས་ཟབ་ལ་གནད་བསྡུས་པ་གསུངས་ཡོད་པ་འདི་ལྟར། "ཞིང་ཡོངས་སུ་སྦྱང་བ་ནི། མ་དག་པ་ཐམས་ཅད་སོ་སོ་རང་གིས་ནུས་པས་དག་པར་བྱ་ཞིང་། དེར་ཆོས་གསུངས་ནས་འབྲས་བུ་དགྲ་བཅོམ་པ་སོགས་འཐོབ་རྒྱུ་ཡོད་པར་བྱས་པ་རྣམས་ཡིན། དཔེར་ན། སྔོན་བྱ་རྒོད་ཕུང་པོའི་རིར་སྟོན་པ་བཅོམ་ལྡན་འདས་ཀྱིས་ཆོས་འཁོར་སྐོར་བའི་སྐབས་སུ། སྤྱིར་རི་དེ་ཉིད་ཆུང་ཆུང་མ་གཏོགས་མེད་ཀྱང་དེར་ལྷ་དང་མིའི་གདུལ་བྱ་བྱེ་བ་ཕྲག་དུ་མ་ལྷན་གཅིག་ཏུ་གནས་ཐུབ་པ་དང་། དེ་ཡང་སངས་རྒྱས་དང་ཐག་རིང་པོ་ཞིག་ལ་བསྡད་པ་མིན་པར་མཐའ་དག་སངས་རྒྱས་ཀྱི་འགྲམ་དུ་བསྡད་ཅིང་གུ་ཡངས་པོར་གནས་ཐུབ་པ་རྣམས་སངས་རྒྱས་ཀྱི་ཞིང་ཡོངས་སུ་སྦྱང་བའི་ནུས་པ་ཡིན་"ཞེས་གསུངས་སོ།

 དེ་ནས་གཞུང་གི་རྩ་བ་མཐའ་མར། །ཕྱོགས་བཅུའི་རྒྱལ་བ་སྲས་བཅས་ཐུགས་རྗེ་དང༌། །རྣམ་དཀར་དགེ་བ་ཇི་སྙེད་ཡོད་པའི་མཐུས། །དེ་ལྟར་བདག་དང་སེམས་ཅན་ཐམས་ཅད་ཀྱི། །སྨོན་ལམ་རྣམ་དག་ཇི་བཞིན་འགྲུབ་གྱུར་ཅིག  །ཅེས་པའི་སྐབས་སུ་ཕྱོགས་བཅུའི་ཞིང་ཁམས་གྲངས་མེད་པ་ན་སངས་རྒྱས་གྲངས་ལས་འདས་པ་ཡོད་ཚུལ། དུས་སྐད་ཅིག་རེ་རེ་ལའང་སེམས་ཅན་མངོན་པར་རྫོགས་པར་འཚང་རྒྱ་བ་དཔག་ཏུ་མེད་ཡོད་པ་དང་། དེ་བཞིན་སྐད་ཅིག་རེ་རེར་བྱང་ཆུབ་སེམས་དཔའ་དཔག་ཏུ་མེད་པ་ས་འོག་མ་ནས་གོང་མ་ལ་མངོན་དུ་བྱ་བ་ཡོད་པའི་སྐོར་རྒྱས་པར་གསུངས་རྗེས། 

༸སྐྱབས་མཆོག་འཁོར་ལོའི་མགོན་པོ་རྒྱལ་བའི་རྒྱལ་ཚབ་ཆེན་པོ་མཆོག་ནས་བཀའ་བརྒྱུད་སྨོན་ལམ་ཐེངས་སོ་ལྔ་པའི་སྔོན་འགྲོའི་བཀའ་ཆོས། ཕྱག་ཆེན་སྨོན་ལམ་གྱི་བཀའ་ཁྲིད་ཆེས་ཟབ་ཅིང་གནད་ལ་ཕན་པ། ལྷག་པར་དུ་རང་ལུགས་སྒྲུབ་བརྒྱུད་པ་རང་གི་ཐུན་མོང་མ་ཡིན་པའི་ཟབ་ལམ་ཕྱག་རྒྱ་ཆེན་པོའི་ལྟ་བ། སྒོམ་པ། སྤྱོད་པའི་སྐོར་ལ་ཉིད་ཀྱི་ཐུགས་ཉམས་བཞེས་མཛད་པའི་ཉམས་མྱོང་ཟབ་མོའི་སྒོ་ནས་བཀའ་ཁྲིད་འགྲན་ཟླ་དང་བྲལ་བ་གནང་བའི་སྒོ་ནས་མཇུག་ལེགས་པར་གྲུབ་བོ། 

མཐའ་དོན་དུ་༸སྐྱབས་མགོན་རྒྱལ་བའི་རྒྱལ་ཚབ་མཆོག་ནས་དེ་ལྟར་ཟབ་མོའི་བཀའ་ཆོས་སྩལ་བའི་དགེ་བའི་རྩ་བ་འདི་ཉིད་ཀྱིས། བདག་ཅག་སྒྲུབ་བརྒྱུད་ཀརྨ་ཀཾ་ཚང་གི་མགོན་སྐྱབས་མཚུངས་ཟླ་མ་མཆིས་པ་༸དཔལ་རྒྱལ་བའི་དབང་པོ་ཀརྨ་པ་སྐུ་ཕྲེང་བཅུ་བདུན་པ་ཆེན་པོ་ཨོ་རྒྱན་འཕྲིན་ལས་དབང་གི་རྡོ་རྗེ་མཆོག་སྐུ་ཚེ་མི་འགྱུར་འཆི་མེད་ཚེ་ལྷའི་ངོ་བོར་བརྟན་པ་དང་། ལྷག་པར་དུ་གང་གི་བྱེས་ཀྱི་གདན་ས་ཆེན་པོ་རུམ་བཏེག་བཤད་སྒྲུབ་ཆོས་འཁོར་གླིང་དུ་ཞབས་སོར་མྱུར་དུ་འཁོད་ནས། གང་གི་མཛད་འཕྲིན་ནམ་མཁའི་ཁྱོན་ལྟར་ཁྱབ་པའི་བསྔོ་སྨོན་མཛད། 

མཐར་༸སྐྱབས་མགོན་རྒྱལ་བའི་རྒྱལ་ཚབ་མཆོག་ལ་མཚུར་ཕུ་བླ་བྲང་དང་བཀའ་བརྒྱུད་སྨོན་ལམ་ཚོགས་པ་ནས་བཀའ་དྲིན་གཏང་རག་གི་ཡོན་དུ་མཎྜལ་འདེགས་འབུལ་ཞུས་ཏེ་བཀའ་བརྒྱུད་སྨོན་ལམ་ཐེངས་སོ་ལྔ་པའི་སྔོན་འགྲོའི་བཀའ་ཆོས་ཕྱག་ཆེན་སྨོན་ལམ་གྱི་བཀའ་ཁྲིད་གཟི་བརྗིད་དང་ལྡན་པའི་ངང་ནས་ལེགས་པར་གྲུབ་བོ། །

ཕྱག་ཆེན་བཀའ་ཁྲིད་ཀྱི་སྐོར་མདོར་བསྡུས་ཙམ་ཞིག་གསར་འགྱུར་གྱི་ཚུལ་དུ་གངས་ལ་ཉི་ཤར་ནས། 

ཕྱི་ལོ་ ༢༠༡༨ ཕྱི་ཟླ་ ༢ ཚེས་ ༢༤ སྔ་དྲོའི་ཆར་སྐྱབས་མགོན་༸རྒྱལ་བའི་རྒྱལ་ཚབ་ཆེན་པོ་ཉིད་སྔར་རྒྱུན་བཞིན་སྤོས་སྣ་དང་རྒྱ་གླིང་བཅས་སྨོན་ལམ་གྱི་གར་སྟེགས་ཀྱི་བཞུགས་ཁྲིར་འཁོད་རྗེས། དད་ལྡན་སློབ་ཚོགས་སྐྱ་སེར་ཕོ་མོ་སྟོང་ཕྲག་དུ་མ་ནས་སྒོ་གསུམ་གུས་པ་དང་བཅས་ཕྱག་ཕུལ་ཞིང་། དེ་ནས་དབུ་མཛད་ཆེན་པོས་དྭགས་པོ་བཀའ་བརྒྱུད་སྤྱིའི་གསོལ་འདེབས་རྡོ་རྗེ་འཆང་ཐུང་མའི་ཞལ་འདོན་དབུ་བཙུགས་ཤིང་མཎྜལ་འདེགས་འབུལ་ཞུས། ༸སྐྱབས་རྗེ་རིན་པོ་ཆེ་མཆོག་ནས་ཕྱག་ཆེན་སྨོན་ལམ་གྱི་བཀའ་ཁྲིད་ཉིན་སྔོན་མའི་མཚམས་ནས་མར་མུ་མཐུད་ནས་གསུངས།

 དེ་ཡང་དང་པོ་ཕྱག་ཆེན་སྨོན་ལམ་གྱི་གཞུང་འདི་ཚིག་ཉུང་ངུའི་སྒོ་ནས་ཕྱག་ཆེན་གྱི་དོན་མ་ལུས་པར་བསྟན་ཚུལ། ཉིན་སྔོན་མར་གསུངས་པ་བཞིན་ཉམས་ལ་ཞེན་པ་མེད་པའི་སྒོ་ནས་རྟོགས་པའི་རྒྱུན་བསྐྱང་ན་ཕྱག་ཆེན་གྱི་རྟོགས་པ་མངོན་དུ་འགྱུར་ཞིང་། ཕྱག་ཆེན་གྱི་རྟོགས་པ་མངོན་དུ་གྱུར་ཚེ་སྤང་བྱ་ཉོན་མོངས་ལ་སོགས་པའི་འཇིགས་པ་མེད་པའི་སྐོར་ཞིབ་ཅིང་ཕྲ་བར་གསུངས། 

དེ་ནས་རྩ་བར། བཟང་ཞེན་ཉམས་ཀྱི་འཛིན་པ་རང་སར་གྲོལ། །ངན་རྟོག་འཁྲུལ་པ་རང་བཞིན་དབྱིངས་སུ་དག །ཐ་མལ་ཤེས་པ་སྤང་བླང་བྲལ་ཐོབ་མེད། །སྤྲོས་བྲལ་ཆོས་ཉིད་བདེན་པ་རྟོགས་པར་ཤོག །ཅེས་པའི་སྐབས་སུ་སྤྱིར་ཉམས་ལ་དཔག་ཏུ་མེད་པ་ཡོད་མོད། གཙོ་བོའི་དབང་དུ་བྱས་ནས་བདེ་བའི་ཉམས། གསལ་བའི་ཉམས། མི་རྟོག་པའི་ཉམས་གསུམ་ཡིན་པ་དང་། 

ལྷག་པར་དུ་མ་བཅོས་པ་སེམས་ཀྱི་གནས་ལུགས་ལ་བཀའ་བརྒྱུད་པ་རྣམས་ཀྱིས་ཐ་མལ་གྱི་ཤེས་པ་ཞེས་མིང་རྫིག་པོ་ཞིག་མ་བཏགས་པ་དང་དེ་ལ་བཟང་ངན་བཏང་དུ་མེད་པའི་སྐོར་ཀྱི་བཀའ་ཁྲིད་འདི་ལྟར། 

"བཟང་ཞེན་ཉམས་ཀྱི་འཛིན་པ་རང་སར་གྲོལ་བ་སྟེ་གཉེན་པོ་གཞན་ཞིག་ལོགས་སུ་བསྟེན་མི་དགོས་པར་ཆུའི་རང་བཞིན་ཆུ་ལ་ཐིམ་པ་བཞིན་ཡིན། དེའི་སྐབས་སུ་བཀའ་བརྒྱུད་པ་རྣམས་ཀྱིས་ཐ་མལ་གྱི་ཤེས་པ་ཞེས་གསུངས། ཐ་མལ་གྱི་ཤེས་པ་ཞེས་མིང་རྫིག་པོ་ཞིག་མ་བཏགས་པར། ཐ་མལ་པའི་མི་ཞེས་ནམ་རྒྱུན་སྐད་ཆ་བཤད་པ་ལྟར་མིང་ཉམ་ཆུང་ཞིག་བཏགས་པར་མཛད། དེ་ཡང་སེམས་ཀྱི་གནས་ལུགས་ཕྱག་རྒྱ་ཆེན་པོ་ལ་མིང་ཆེན་པོ་ཞིག་དང་རྫིག་པོ་བཏགས་ནས་བཟང་དུ་འགྲོ་རྒྱུ་ཞིག་དང་། མིང་སྡུག་པོ་ཞིག་བཏགས་ནས་ངན་པའི་གྲལ་དུ་འགྲོ་བ་ཞིག་མིན་པར་བཟང་ངན་གང་དུའང་གྲུབ་པ་ཞིག་མེད། སེམས་དེ་ཉིད་ཀྱི་གནས་ལུགས་རང་བབ་ཇི་ལྟར་ཡོད་པ་དེ་མ་བཅོས་པར་དེ་ཀ་རང་བཞག་དགོས། དེ་ལྟ་བུའི་གནས་ལུགས་ལ་སྔོན་གྲུབ་ཐོབ་རྣམས་ཀྱིས་ཡག་ཏུ་བཏང་རྒྱུ་དང་། མི་ཤིན་ཏུ་སྡིག་ཅན་ཞིག་གིས་མར་ངན་དུ་བཏང་བ་སོགས་བྱ་རྒྱུ་ཅི་ཡང་མེད། རྗེ་བཙུན་མི་ལ་རས་པ་ལ་སོགས་གྲུབ་ཐོབ་རྣམས་ཀྱི་ཐ་མལ་གྱི་ཤེས་པ་དེ་དང་། ད་ལྟ་ང་ཚོ་ལ་ཡོད་པའི་ཐ་མལ་གྱི་ཤེས་པ་རྣམས་ཀྱང་ཁྱད་པར་ཅི་ཡང་མེད། དེ་བཞིན་མར་པ་དང་། དྭགས་པོ་རིན་པོ་ཆེ། ཀརྨ་པ་སྐུ་ཕྲེང་རིམ་བྱོན་རྣམས་ཀྱི་ཐ་མལ་གྱི་ཤེས་པ་དང་ང་ཚོའི་ཐ་མལ་གྱི་ཤེས་པ་གཉིས་ལ་ཁྱད་པར་མེད། མ་ཟད་སངས་རྒྱས་ཀྱི་ཐུགས་དང་ང་ཚོའི་ཐ་ལམ་གྱི་ཤེས་པ་གཉིས་ལའང་ཁྱད་པར་མེད" ཅེས་གསུངས་སོ། 

ཡང་མཉམ་མེད་དྭགས་པོ་བཀའ་བརྒྱུད་ཀྱི་ཐུན་མོང་མིན་པའི་རང་ལུགས་སུ་ལམ་དང་འབྲས་བུ་གཉིས་སུ་མེད་པ་དང་འབྲས་བུ་ལམ་དུ་བྱེད་ཚུལ་སྐོར་ཚིག་ཉུང་ངུའི་སྒོ་ནས་དོན་ཤིིན་ཏུ་ཟབ་པོར་གསུངས་པ་འདི་ལྟར། 

"ཕྱག་ཆེན་ལུགས་ལ་ལམ་དང་འབྲས་བུ་གཉིས་སུ་མེད་པ་ཡིན། ལམ་ཞེས་པ་སྒྲིབ་པ་མེད་པར་བཟོ་བྱེད་དང་། འབྲས་བུ་ཞེས་པ་སྒྲིབ་པ་བྲལ་ཞིང་དག་པ་ལ་གསུངས། དག་པའི་བྱང་ཆུབ་དེ་ཡང་སེམས་ཀྱི་གནས་ལུགས་སྙིང་པོ་དེ་ཡིན། ལམ་དེ་ཡང་སེམས་ཀྱི་གནས་ལུགས་བདེ་གཤེགས་སྙིང་པོ་དེ་ཡིན། སྒྲིབ་པ་མེད་པར་བཟོ་བྱེད་ནི་ཏིང་ངེ་འཛིན་དང་ཤེས་རབ་གཉིས་ཡིན་མོད། ཤེས་རབ་ནི་གནས་ལུགས་ཕྱག་རྒྱ་ཆེན་པོ་དེ་ཉིད་རང་ཡིན། ཏིང་ངེ་འཛིན་ཡང་དང་པོ་ནས་སྙིང་པོ་དེ་ཉིད་གཡོ་བ་མེད་པར་གནས་པས་ཏིང་ངེ་འཛིན་ཡང་དེ་ཡིན། དེ་དག་རྣམས་གསར་དུ་བཟོས་པ་ཞིག་མེད་ཅེས་དང། ཡང་གདོད་མ་ནས་གནས་པའི་སྙིང་པོ་དེ་རང་ཏིང་ངེ་འཛིན་ཡིན། སྙིང་རྗེ་དང་དད་པ་རྣམས་ཀྱང་སྙིང་པོའི་རང་བཞིན་ཡིན། ལམ་དང་འབྲས་བུ་གཉིས་སུ་མེད་པའི་ཚུལ་གྱིས་ཉམས་སུ་ལེན་ན་འབྲས་བུ་ལམ་དུ་བྱེད་པ་ཡིན། འབྲས་བུ་དེ་ཡང་གནས་ལུགས་ཕྱག་རྒྱ་ཆེན་པོ་ཡིན་ཞིང་། ལམ་དེ་ཡང་གནས་ལུགས་ཕྱག་རྒྱ་ཆེན་པོ་ཡིན་" ཞེས་གསུངས། 

དེ་བཞིན་འཁོར་འདས་ཀྱི་ཆོས་ཐམས་ཅད་གནས་ལུགས་བདེ་གཤེགས་སྙིང་པོ་ལ་བརྟེན་ནས་བྱུང་ཚུལ། 

ལྷག་པར་དུ་ཕྱག་ཆེན་པ་མཉམ་མེད་འགྲོ་མགོན་བཀའ་བརྒྱུད་པ་རྣམས་ཀྱིས་སེམས་ཅན་དང་། བྱང་ཆུབ་སེམས་དཔའ། སངས་རྒྱས་རྣམས་ཀྱི་གདགས་གཞི་ཐུན་མོང་མ་ཡིན་པར་གསུངས་པ་འདི་ལྟར། 

"ཕྱག་ཆེན་ཉམས་སུ་ལེན་པ་རྣམས་ཀྱིས་སེམས་ཅན་དང་། བྱང་ཆུབ་སེམས་དཔའ། སངས་རྒྱས་སོགས་མིང་བཏགས་པའི་གཞི་ནི་བདེ་གཤེགས་སྙིང་པོ་དེ་ཉིད་ཡིན། དེ་ཡང་སེམས་ཅན་ཞེས་པ་དེ་གློ་བུར་གྱི་སྒྲིབ་པ་ལ་མི་གོ་བར། དེ་ངོ་མ་ནི་སྒྲིབ་པ་དེ་གོས་པའི་གཞི་བདེ་གཤེགས་སྙིང་པོ་ལ་གོ་དགོས་པ་ཡིན། དེས་ན་གསང་སྔགས་ཀྱི་ནང་དུ་སེམས་ཅན་ཐམས་ཅད་ལྷ་ལ་སྒོམ་དགོས་པ་ཡིན་ཞེས་གསུངས། བཀའ་བརྒྱུད་པ་རྣམས་ཀྱིས་སེམས་ཅན་ཞེས་པ་དེ་ང་ཚོའི་མིག་གིས་རིག་རྒྱུ་ཡོད་པ་དེ་ལ་ངོས་བཟུང་བ་མིན་པར། དེའི་རྒྱུད་ལ་ཡོད་པའི་བདེ་གཤེགས་སྙིང་པོ་ལ་གོ་དགོས། དེ་ལྟར་བྱས་ན་སྒོམ་ཉམས་ལེན་དང་གོ་བ་ལའང་ཕན་ཐོགས་ཡོད། བྱང་ཆུབ་སེམས་དཔའ་དེའང་འཇམ་དབྱངས་དང་བྱམས་པ་ལ་སོགས་གང་ཟག་གི་རྣམ་པ་དེ་མིན་པར། དེའི་ཐུགས་རྒྱུད་ལ་ཡོད་པའི་བདེ་གཤེགས་སྙིང་པོ་སྒྲིབ་པ་ཕྱེད་ཙམ་བྲལ། ཕྱེད་ཙམ་མི་བྲལ་བ་དེ་ལ་གོ་དགོས། རྫོགས་པའི་སངས་རྒྱས་གཙོ་བོ་ནི་ཆོས་ཀྱི་སྐུ་བདེ་གཤེགས་སྙིང་པོ་ཆ་ཚང་བ་མངོན་དུ་གྱུར་པ་དེ་ཡིན།" ཞེས་ཤིན་ཏུ་ཟབ་རྒྱས་ཀྱིས་སྒོ་ནས་གསུངས།  

དེ་ནས་སེམས་ཉིད་གནས་ལུགས་ཕྱག་རྒྱ་ཆེན་པོ་དེ་ཉིད་དག་མ་དག་གང་གིའང་སྐབས་སུ་འགྱུར་བ་མེད་པ་དང་། བྱང་ཆུབ་སེམས་དཔའ་རྣམས་ཀྱིས་གནས་ལུགས་ཕྱག་རྒྱ་ཆེན་པོ་དེ་ཉིད་རྟོགས་པ་ལ་བརྟེན་ནས་འགྲོ་བའི་དོན་བྱེད་ཚུལ་རྣམས་རྒྱས་པར་གསུངས། 

ཡང་ཀུན་གཞི་རྣམ་ཤེས་དང་ཀུན་གཞི་ཡེ་ཤེས་ཀྱི་སྟེང་དུ་དག་མ་དག་གི་བག་ཆགས་ཇི་ལྟར་བཞག་པའི་སྐོར་བཀའ་ཁྲིད་ཤིན་ཏུ་ཟབ་གནད་ཆེན་པོ་གསུངས་པ་འདི་ལྟར། 

"བག་ཆགས་ནི་ཀུན་གཞིའི་སྟེང་དུ་ཉི་མ་རེ་རེ་བཞིན་ལ་གསོག་པར་བྱེད་ཀྱི་ཡོད། དེ་ཡང་ཐ་ན་འཇིག་རྟེན་གྱི་བྱ་བ་སྔ་དྲོ་ཁྲུས་བྱ་བ་དང་། མིག་གིས་གཟུགས་མཐོང་བ་དང་། ཡང་ནང་རྣམ་རྟོག་སྐད་ཅིག་གཅིག་འགྱུ་བ་ཚུན་སྒོ་གསུམ་གྱི་བྱ་བ་ཅི་ཞིག་བྱེད་ཀྱང་ཀུན་གཞིའི་སྟེང་དུ་བག་ཆགས་བཞག །ཡང་གནས་ལུགས་ཕྱག་རྒྱ་ཆེན་པོ་ལ་དད་པ་སྐྱེས་པ་དང་། དེ་ལ་ཡི་རང་བ་སོགས་ནི་ཀུན་གཞི་རྣམ་ཤེས་ཀྱི་རང་བཞིན་ཀུན་གཞི་ཡེ་ཤེས་ཀྱི་སྟེང་དུ་བཞག་པ་ཡིན། མ་དག་པའི་ཀུན་གཞི་རྣམ་ཤེས་ལ་བག་ཆགས་རྣམས་གསར་དུ་གསོག་དགོས་པ་ཡིན། འོན་ཀྱང་ཀུན་གཞི་ཡེ་ཤེས་ལ་དེ་ལྟར་གསར་དུ་གསོག་མི་དགོས་པར་ཐོས་པའི་བག་ཆགས་ཞེས་པ་དམ་པའི་ཆོས་ཐོས་ནས་སྙིང་པོ་ལ་སྒྲིབ་པའི་སྒྲིབ་པ་རྣམས་རེ་རེ་བསལ་ཞིང་སྙིང་པོ་དེ་ཉིད་མངོན་དུ་གྱུར་བ་ལ་བག་ཆགས་བསགས་ཞེས་མིང་བཏགས་པར་མཛད་པ་ཡིན་" ཞེས་གསུངས་སོ། 

ཡང་དེ་བཞིན་འཇིག་རྟེན་པ་དང་ཕྱག་ཆེན་པ་རྣམས་ཀྱིས་དངངས་སྐྲག་སྐྱེ་ཡུལ་ཐ་དད་པར་གསུངས་པ་འདི་ལྟར།  "འཇིག་རྟེན་པ་རྣམས་ཀྱི་ཕྱིའི་སྣང་བ་ལ་སྐྲག་ནས་གནས་ཀྱི་ཡོད། ང་ཚོ་སྤྱིར་ཆོས་པ་ལྷག་པར་དུ་སྒྲུབ་བརྒྱུད་པ་ཕྱག་ཆེན་ཉམས་སུ་ལེན་པ་རྣམས་ནང་སེམས་ལ་སྐྲག་དགོས། དེ་ཡང་སེམས་དེ་གནས་ལུགས་ཀྱི་ངང་ལ་མི་གནས་པར་ཕྱིན་ཅི་ལོག་ཏུ་འཁྲུལ་བར་གྱུར་པས་དེ་ལ་སྐྲག་པ་ཞིག་དགོས་ངེས་ཡིན། དེ་བཞིན་འཇིག་རྟེན་པ་རྣམས་ཕྱི་གཟུགས་བདེ་བ། རྒྱུ་ནོར་དཔལ་འབྱོར། དེ་བཞིན་མིང་སྙན་གྲགས་ལ་དགའ་བར་བྱེད། འོན་ཀྱང་དེ་དག་ནི་ཤིན་ཏུ་མི་བརྟན་པ་སྐད་ཅིག་མའི་རང་བཞིན་དཔེར་ན་གློག་འཁྱུག་པ་ལྟ་བུ་ཡིན་པས་སྙིང་པོ་མེད། སེམས་ཀྱི་གནས་ལུགས་བདེ་གཤེགས་སྙིང་པོ་ལ་དགའ་བ་བྱེད་དགོས། དེ་ལ་དགའ་ན་སྙིང་པོ་དེ་ཉིད་ཆེས་གསལ་བར་གྱུར་ནས་དེའི་བདེ་བ་ནི་ནམ་ཡང་རྫོགས་པ་མེད་པར་ད་དུང་གོང་ནས་གོང་དུ་འཕེལ་བར་གྱུར། འཇིག་རྟེན་པ་དང་ང་ཚོ་ཕྱག་རྒྱ་ཆེན་པོ་ཉམས་ལེན་པ་རྣམས་ཀྱི་དགའ་བ་དང་དངངས་སྐྲག་སྐྱེས་ཡུལ་ཐ་དད་པ་བཤད་པ་ཡིན" ཞེས་གསུངས་སོ། 

རྩ་བར། འགྲོ་བའི་རང་བཞིན་རྟག་ཏུ་སངས་རྒྱས་ཀྱང༌། །མ་རྟོགས་དབང་གིས་མཐའ་མེད་འཁོར་བར་འཁྱམས། །སྡུག་བསྔལ་མུ་མཐའ་མེད་པའི་སེམས་ཅན་ལ། །བཟོད་མེད་སྙིང་རྗེ་རྒྱུད་ལ་སྐྱེ་བར་ཤོག །ཅེས་པའི་སྐབས་སུ་གནས་ལུགས་ཕྱག་རྒྱ་ཆེན་པོ་དང་སྙིང་རྗེ་ཟུང་འཇུག་གི་སྒོ་ནས་ཉམས་སུ་ལེན་པ་དེ་ཡིན་པ་དང་། བྱང་ཆུབ་མཆོག་ཏུ་སེམས་བསྐྱེད་པ་དང་སྒོམ་ཉམས་ལེན་སོགས་བྱ་བའི་ཚེ་སྙིང་རྗེ་གཙོ་བོ་ཡིན་པ་དང་བྱམས་པ་སོགས་ཚད་མེད་བཞི་རྣམས་སྙིང་རྗེར་འདུས་པ་དང་། རྣམ་རྟོག་གིས་བསྐྲུན་པའི་སྙིང་རྗེ་དེ་ཉིད་ལ་བརྟེན་ནས་དོན་དམ་བདེ་གཤེགས་སྙིང་པོའི་སྙིང་རྗེ་དེ་མངོན་དུ་བྱ་དགོས་པའི་ཚུལ་གསུངས། 

ཆོས་ཐུན་འདིའི་ནང་དུ་༸སྐྱབས་མགོན་རྒྱལ་བའི་རྒྱལ་ཚབ་མཆོག་ནས་རང་ལུགས་བཀའ་བརྒྱུད་པའི་ཐུན་མོང་མ་ཡིན་པའི་བཞེད་ཕྱོགས་ལྟ་སྒོམ་སྤྱོད་གསུམ་སྐོར་ཤིན་ཏུ་ཟབ་གནད་དུ་མར་གསུངས་ཡོད་པས་མཐའ་དག་འདིར་བཀོད་ཐབས་བྲལ་བས་མཁྱེན་འདོད་མཆིས་རིགས་རྣམས་དྲྭ་རྒྱའི་ཐོག་ནས་གཟིགས་པར་ཞུ། 

འོན་ཀྱང་འདིར་བཀའ་ཁྲིད་ཀྱི་སྙིང་བསྡུས་ཙམ་ཞིག་གསར་འགྱུར་ཀྱི་ཚུལ་དུ་གངས་ལ་ཉི་ཤར་ནས། 

དེའི་རྗེས་ཉིན་སྔ་མ་ལྟར་འདུས་པ་ཡོངས་ནས་སྒྲོལ་མ་གྲངས་གསོག་གི་དབུ་བཟུང་སྟེ་ཆོས་ཐུན་གཉིས་པ་དབུ་འཛུགས་བསྐྱངས། 

དེ་ནས་རིན་པོ་ཆེས་བཀའ་སྩལ་དོན། ད་ལུས་དང་ཚོར་བ་དྲན་པ་ཉེར་བཞག་ཏོག་ཙམ་བཞུགས་རོགས། དེ་ཡང་ལུས་བསྲངས་ཏེ་བཞུགས་རོགས་ཞེས་གསུངས་ནས་དང་པོ་ལུས་ཀྱི་གནད་རྣམས་རིམ་གྱིས་ངོ་སྤྲོད་ཅིང་ཚོར་བ་བདེ་སྡུག་སོགས་གང་བྱུང་བ་དེ་ལ་མ་བརྟགས་པར་བཞག །དེ་ནས་རིམ་པར་ཚོར་བའི་སྟེང་དུ་བཞག་དགོས་པར་བཀའ་སྩལ་ཏེ་འདུས་པ་ཡོངས་ནས་ཀྱང་དེ་བཞིན་སྐར་མ་ཁ་ཤས་རིང་སྒོམ་ལ་ཞུགས། དེའི་རྗེས་དྲི་བའི་ཚུལ་དུ། ད་བར་ལུས་དང་ཚོར་བ་དྲན་པ་ཉེར་བཞག་ཚར་གཉིས་སྒོམ་པ་ཡིན། ཆོས་ཐུན་དང་པོ་དེ་ལ་ཡག་པོ་བྱུང་ངམ་ཆོས་ཐུན་འདི་ལ་ཡག་པ་བྱུང་། གང་ལྟར་ཡང་གཉིས་ཀ་ཡག་པོ་བྱུང་འདུག །སྒོམ་གྱི་ཉམས་འདི་སྐད་ཅིག་རེ་རེ་ནས་འགྱུར་ཏེ་འགྲོ་ཡི་རེད། སྔ་དྲོ་༧སྐྱབས་རྗེ་རྒྱལ་ཚབ་རིན་པོ་ཆེས་གསུངས་པ་བཞིན་ཉམས་དང་རྟོགས་པ་གཉིས་ཡོད། སྤྲོས་བྲལ་རྟོགས་པའི་སྒོ་ནས་སྒོམ་རྒྱབ་པ་ཡིན་ན་ཉམས་ལ་འགྱུར་ལྡོག་མེད་པ་ཡིན། ད་བར་མ་སྒོམ་པའི་དོན་ཞུས་ཟིན་པ་ཡིན། གཉིས་པ་མ་ཡེངས་གསུངས་པ་རེད། ཅེས་པ་འདི་དྲན་པར་བརྟག་སྟེ་བསྡད་དགོས། དེ་ཡང་དཔེར་ན་ལུག་རྫི་དང་སོ་པ་བཞིན་ལུག་རྫིས་ལུག་རྣམས་ཐང་ལ་བཞག་ནས་རང་ཉིད་རི་ཐོག་ནས་མར་ལྟ་བ་དང་། སོ་པས་ཀྱང་མི་དེ་ཡི་བྱ་སྤྱོད་བཟང་ངན་ལ་མ་ལྟ་བར་མི་འདིས་གང་བྱེད་མིན་ལྟ་བ་བཞིན་དགོས། ད་ལྟ་ང་ཚོས་ལུས་སེམས་དྲན་པ་ཉེར་བཞག་སྒོམ་པའི་སྐབས་སུ་ཡང་ཚོར་བ་བདེ་སྡུག་བཟང་ངན་སྡིག་སྡུག་གང་འདྲ་ཞིག་བྱུང་ཡང་ཁོ་རང་གི་ངོ་བོ་ལ་མ་བལྟས་བར་རང་སར་བཞག་པ་ཡིན་ན་སྣང་བ་སྒོམ་དུ་ཤར། ཉོན་མོངས་གྲོགས་སུ་ཤར་བ་དེ་དག་འོང་བ་ཡིན། དེ་ལ་ལྟ་བ་ཡིན་ན་བདེ་སྡུག་གི་དབང་དུ་མི་འགྲོ་གསུངས། དཔེར་ན། རང་ཉིད་ཆུ་ཡི་ནང་ཐིམ་བཞིན་པར་ཆུ་ནང་ལྟ་ན་ཆུ་མི་མཐོང་བ་དང་། གལ་ཏེ་རང་ཉིད་ཆུ་ཡི་ཕྱི་རོལ་དུ་གནས་བཞིན་པར་ཆུ་ལ་ལྟ་བ་ཡིན་ན། ཆུ་ཡི་གཡོ་འགུལ་མཐོང་བ་དང་དེས་མི་གནོད་པ་བཞིན་རེད། སྐབས་དེར་གློག་བརྙན་གྱི་དཔེ་ཡང་གསུངས། དེས་ན་ཉོན་མོངས་པ་དེ་དག་ཤུགས་ཀྱིས་མ་བཀག་པར་གྲོགས་སུ་ཁྱེར་བ་བྱ་དགོས། དེར་བརྟེན་སྒོམ་གྱི་སྐབས་སུ་ཚོར་བ་བདེ་སྡུག་དང་བཟང་ངན་ལ་བལྟས་པ་ཡིན་ན་དེའི་དབང་དུ་མི་འགྲོ་གསུངས་པ་ཡིན། དེ་ནས་མ་སྒོམ། མ་ཡེངས། ད་གང་བྱ་དགོས་ཞེ་ན། བཟོ་མེད་ཅེས་གསུངས། བདེ་གསལ་མི་རྟོག་པར་བཟོ་བཅོས་མེད་པར་འཇམ་ཐིང་ངེ་བཞག་དགོས་པ་ཡིན། 

དེ་ནས་ངས་སྒོམ་ཐབས་དམིགས་བསལ་བ་ཞིག་ཞུ་རྒྱུ་ཡིན། དེ་ཡང་ཚོར་བ་སྡུག་བསྔལ་ལ་དམིགས་པ་གཏད་དེ་སྒོམ་ན་ཚོར་བ་མི་འདྲ་བ་ཞིག་འོང་གི་ཡོད། དེ་ཡང་ཡུན་རིང་བསྡད་པས་རྐང་པ་ན་བ་དང་ཚ་བས་འཚིག་པ་དང་ཡུན་རིང་དྲགས་པའི་ཉོབ་སྣང་གི་ཚོར་བ་སོགས་གང་བྱུང་བ་ཐམས་ཅད་སྡུག་བསྔལ་རེད། ད་ལྟ་ཁྱེད་རྣམས་ལ་དེ་ལྟ་བུའི་ཚོར་བ་སྡུག་བསྔལ་འདུག་གམ་མི་འདུག །ཚོར་བ་སྡུག་བསྔལ་ལ་སྒོམ་རྒྱབ་པ་ལ་ཚོར་བ་སྡུག་བསྔལ་ཡོད་དགོས། དེ་མེད་ན་འགྲིགས་ཀྱི་མེད། དཔེར་ན་དགྲ་ལ་དམིགས་ནས་སྒོམ་དུས་དགྲ་ཡོད་དགོས་པ་བཞིན་རེད། ཚོར་བ་སྡུག་བསྔལ་འདི་མེད་ན་དཀའ་ལས་ཁག་པོ་ཆགས་པ་རེད། ཚོར་བ་སྡུག་བསྔལ་དེ་དག་མེད་ན་ང་ལ་ཐབས་ཤེས་ཤིག་ཡོད། མཛུབ་མོའི་རྩེ་འདི་མནན་པ་ཡིན་ན་ཚོར་བ་སྡུག་བསྔལ་ཡོད་རེད། དེ་ཡང་རིམ་གྱིས་མནན་པ་མ་གཏོགས་ལམ་སེང་མནན་པ་ཡིན་ན་ན་ཟུག་ཆེན་པོ་འོང་གི་རེད། ད་ང་ཚོས་འདིའི་སྟེང་དུ་སྒོམ་རྒྱབ་རྒྱུ་ཡིན། ཚང་མས་མགོ་ནས་རྐང་མཐིལ་བར་ཚོར་བ་ཇི་ལྟར་བྱུང་བ་དག་ལ་སེམས་རིམ་གྱིས་གཏད་དེ་ལུས་ཚོར་ལ་མཉམ་པར་བཞག་རོགས། དེ་ནས་དམིགས་བསལ་ལུས་ཚོར་སྡུག་བསྔལ་བ་ཞིག་ལ་སེམས་གཏད་རོགས། གལ་ཏེ་སྡུག་བསྔལ་མེད་པ་ཡིན་ན་ན་ཟུག་བཟོས་ནས་སེམས་གཏད་རོགས་གནང་། ད་སྤྱན་ཕྱེ་ནས་རང་བབས་སུ་བཞུགས་རོགས། ད་གང་འདྲ་བྱུང་སོང་། 

དེ་ལ་མྱོང་བ་བཞི་ཡོད། དང་པོ་ན་ཟུག་ལ་ལྟ་དུས་ན་ཟུག་མ་རྙེད་པར་བརླགས་འགྲོ་ཡི་རེད། དེ་སྐབས་དྲན་པ་འདི་མ་ཡེངས་པར་གནས་བསྡད་ཡོད། གཉིས་པ་ན་ཟུག་ལ་སེམས་གཏད་དུས་ན་ཟུག་འགྱུར་འགྲོ་ཡི་རེད། དཔེར་ན་རྐང་པ་ལ་སེམས་གཏད་དུས་རྐེད་པར་ཕར་འཕོ་འགྲོ་བ་ནང་བཞིན་རེད། དེ་ཡང་ཡག་པོ་རེད། ན་ཟུག་དེ་དག་སྒོམ་གྱི་རྐྱེན་དུ་འགྱུར་བ་རེད། གསུམ་པ་ན་ཟུག་ལ་སེམས་གཏད་དུས་འགྱུར་ལྡོག་གང་ཡང་མེད་པར་ན་ཟུག་ལ་སེམས་གནས་པ་འདི་ན་ཟུག་འདི་སེམས་ཀྱི་རྟེན་དུ་འགྱུར་བ་རེད། མྱོང་བ་ཐ་མ་འདི་ན་ཟུག་ལ་སེམས་གཏད་སྐབས་ན་ཟུག་ཆེ་རུ་ཕྱིན་པའང་ཡོད། འདི་ཁམས་ཀྱི་དབང་གི་རེད། ཡང་ན་རེ་དོགས་ཀྱི་དབང་གི་རེད། གལ་སྲིད་ན་ཟུག་ལ་སེམས་གཏད་དུས་ན་ཟུག་ཤུགས་ཆེ་རུ་ཕྱིན་ན་དེ་དག་མ་སྒོམ་པར། སྒོམ་གྱི་གནད་གཞན་ཞིག་སྒོམ་ནའང་འགྲིགས་པ་ཡིན། ད་ན་ཟུག་གི་སྒོམ་ལ་ཡང་ཡག་པོ་འདུག་ཟེར་ནས་དགའ་སྤྲོ་བྱུང་བ་ག་ཚོད་ཡོད། ཕྱག་བརྐྱང་རོགས་གནང་། དཔེ་མེད་ཡག་པོ་རེད། དེ་ནས་བཞད་མོ་བཞད་བཞིན་པའི་ངང་ནས། ན་ཟུག་སྒོམ་གྱི་གྲོགས་སུ་འགྱུར་བ་རེད། ཉིན་མ་གཉིས་ཀྱི་ནང་ན་ཟུག་གྲོགས་སུ་འགྱུར་བ་དཔེ་རེད། དེ་བཞིན་རྣམ་རྟོག་སོགས་ཀྱང་སྒོམ་གྱི་གྲོགས་སུ་འགྱུར་ཐུབ་པའི་རེ་བ་ཡོད་ཅེས་གསུངས། 

སྤྱིར་བཏང་སྒོམ་རྒྱབ་སྐབས་དབྱིབས་དང་ཁ་དོག་སོགས་ལ་སེམས་གཏད་དེ་སྒོམ་པ་ཡང་ཡོད་དེ་ནི་སྐུ་ཡི་རིགས་དང་། མིང་དང་ཚིག་ལ་དྲན་པ་གཏད་ནས་སྒོམ་པ་ཡང་ཡོད་དེ་ནི་གསུང་གི་རིགས་དང་། དེ་ནས་ཐུགས་ཀྱི་རིགས་ཀྱང་རང་རང་སོ་སོའི་ཚོར་བ་ལ་སེམས་གཏད་ནས་སྒོམ་རྒྱབ་པ་འདི་རེད། སྒོམ་རྒྱབ་པའི་སྐབས་སོ་སོའི་ཁམས་དང་བསྟུན་ནས་སྒོམ་གྱི་སྣང་བ་མི་འདྲ་བ་གསུམ་འབྱུང་གི་རེད། འདི་གང་བྱུང་ཡང་ཚང་མ་སྒོམ་གྱི་ཆ་རྐྱེན་མ་གཏོགས་ཕྱོགས་གཅིག་འདི་ནོར་སོང་བ་ལྟ་བུ་མ་རེད། རང་གིས་གང་མོས་ན་དེ་དག་ལ་སེམས་གཏད་དེ་སྒོམ་རོགས་གནང་། 

ཡང་གདམ་ཀ་གཅིག་ཞུ་རྒྱུ་ཡིན། ང་ཚོ་སྒོམ་རྒྱབ་པའི་སྐབས་སེམས་ལ་གང་འཆར་བ་ཐམས་ཅད་སྒོམ་གྱི་གྲོགས་སུ་འགྱུར་བ་ཡིན་གསུངས་ཡོད། དེ་ཡང་སྔ་དྲོ་༧སྐྱབས་རྗེ་རྒྱལ་ཚབ་རིན་པོ་ཆེས་བྱིང་བ་དང་རྒོད་པ་ཉོན་མོངས་གང་འབྱུང་བ་ཐམས་ཅད་སྒོམ་གྱི་གྲོགས་ཡིན་གསུངས་བ་བཞིན་རེད། གདམ་ཀ་གཉིས་པ་འདི། གོང་དུ་བཤད་པ་ལྟར་དྲན་པའི་སྐོར་འདི་རེད། དང་པོ་འདི་བཤད་ན་ཐང་ཆད་པ་དང་སེམས་ནག་འཐོམ་མེ་ཆགས་པའི་སྐབས་ཚོར་བ་དག་གསལ་མི་གསལ་ཡོད། འདི་སྐབས་སུ་ཡང་ཚོར་བ་ལ་སེམསགཏད་ནས་བཞག་དགོས། གཉིད་ཁུག་ལ་ཉེ་བའི་སྐབས་བྱིང་རྒོད་ལ་སེམས་གཏད་པ་ཡིན་ན་གཅིག་བྱས་ན་གཉིད་ཀྱང་སྒོམ་དུ་འགྱུར་སྲིད། འདི་ཏོག་ཙམ་ཁག་པོ་ཡོད། གལ་སྲིད་དེ་ལྟར་བྱེད་པ་ཡིན་ན་གཉིད་འདི་དྲན་པས་ཟིན་ནས་གཉིད་ལས་མ་སད་བར་སྒོམ་དུ་འགྱུར་བ་ཡིན། དེ་ལས་གཞན་དུ་རྐང་ལག་ན་བ་ལྟ་བུ་ལ་ཡང་སེམས་གཏད་ནས་སྒོམ་ཡང་ཆོག །ད་ང་ཚོ་སྒོམ་རྒྱབ་རྒྱུ་ཡིན། ཚང་མས་མགོ་ནས་རྐང་མཐིལ་བར་སྔར་བཞིན་སེམས་གཏད་དེ་བཞུགས་རོགས་གནང་། དེ་ཡང་མིག་བཙུམ་ནས་བཞུགས་རོགས། གཉིད་ཁུག་ཀྱང་རུང་རྐང་ལག་ན་བ་སོགས་ཚོར་བ་གང་བྱུང་ཡང་ཚོར་བ་དེ་དག་ལ་མ་ཡེངས་པར་འདི་ཡི་ཐོག་ཏུ་བཞག་རོགས་གནང་། རྒྱུན་དུ་ཚོར་བ་ནག་འཐོམ་མེ་བ་དང་སྐབས་འགར་ཚོར་བ་གསལ་ལིང་ངེ་བ་སོགས་གང་བྱུང་ཡང་དེ་དག་ལ་སེམས་གཏད། དེ་ལྟར་མ་ཡིན་པར་གཉིད་ཁུག་ལ་ཉེ་བ་ཡིན་ན་ཡང་དེ་ལ་སེམས་གཏད། མ་ཡེངས་བར་བཞག །ད་སྤྱན་ཕྱེ་ནས་སེམས་རང་བབས་སུ་བཞག་རོགས། མདོར་བསྡུས་ན་སྒོམ་གྱི་ངོ་བོ་དྲན་པ་རེད། གསལ་བ་དང་། མི་རྟོག་པ་འདི་ཚོ་སྒོམ་གྱི་ཉམས་རེད་མ་གཏོགས་སྒོམ་གྱི་ངོ་བོ་མ་རེད། རང་རང་གི་སེམས་ལ་ཚོར་བ་བཟང་ངན་སོགས་གང་འདྲ་ཞིག་འཆར་ཡང་དེ་ལ་མ་ཡེངས་པར་སེམས་རང་བབས་སུ་བཞག་པ་ནི་སྒོམ་གྱི་ངོ་བོ་ཡིན་པས་ཚང་མས་དེ་བཞིན་ཉམས་ལེན་གནང་རོགས། དེ་རིང་དེར་མཚམས་བཞག་རྒྱུ་ཡིན་ཞེས་གསུངས་མཐར་འདུས་མང་ཡོངས་ནས་གནས་བརྟན་ཕྱག་མཆོད་དང་ཞབས་བརྟན་རིགས་གསུངས་རྗེས་གདངས་དབྱངས་དང་བཅས་ཏེ་ཕྱག་ཆེན་སྨོན་ལམ་དང་བོད་ཡུལ་བདེ་སྨོན་གསུངས་ནས་རེ་ཞིག་གསུང་ཆོས་ཉིན་གཉིས་པ་ལེགས་པར་གྲུབ་སོང་། 

བསམ་གཏན་མཐར་ཕྱིན་ནས།

སྤྱི་ལོ་ ༢༠༡༨ ཟླ་ ༢ པའི་ཚེས་ ༢༣ ཉིན་རྒྱབ་གྲྭ་བཙུན་དང་དད་ལྡན་ཆོས་ཞུ་བ་ཡོངས་བཞུགས་གྲལ་དུ་འཁོད་རྗེས་སྤྱན་རྒྱ་སྤོས་སྣེའི་བསུ་མ་དང་བཅས་༸སྐྱབས་རྗེ་ཡོངས་དགེ་ཡོངས་དགེ་མི་འགྱུར་རིན་པོ་ཆེ་བཞུགས་ཁྲིར་གདན་དྲངས། དབུ་མཛད་ཀྱིས་རྡོ་རྗེ་འཆང་ཐུང་མ་ནས་རིམ་བཞིན་ཆོས་ཁྲིད་ཀྱི་སྔོན་འགྲོ་གྲུབ་རྗེས། 

སྐྱབས་རྗེ་མི་འགྱུར་རིན་པོ་ཆེ་མཆོག་གིས། བྱང་ཆུབ་ཀྱི་སེམས་རྒྱུད་ལ་སྐྱེ་ཐབས་སྐོར་གསུང་དོན། 

ཐུགས་བྱང་ཆུབ་མཆོག་ཏུ་སེམས་བསྐྱེད་དེ་གསན་པར་འཚལ། ཆོ་ག་ཆོས་སྤྱོད། ཕྱག་སྐོར་བ་སོགས་དགེ་བའི་ལས་གང་གནང་ན་བྱང་ཆུབ་སེམས་ཀྱི་རྩིས་ཟིན་པར་བྱེད་རྒྱུ་དེ་ཧ་ཅང་གལ་ཆེན་པོ་རེད།  དེ་ཡིན་ཙང་བྱང་ཆུབ་མཆོག་ཏུ་སེམས་བསྐྱེད་དེ་གསན་པར་ཞུ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་སྙིང་པོ་སྦྱོར་དངོས་མཇུག་གསུམ་ལས་སྦྱོར་བ་སྐྱབས་འགྲོའི་སྐོར་མདོར་བསྡུས་ཞུས་ཟིན་པ་ཡིན། དེ་རིང་བྱམས་སྙིང་རྗེ་བྱང་ཆུབ་སེམས་ཀྱི་སྐོར་ནས་མདོར་བསྡུས་ཞུ་རྒྱུ་ཡིན། བྱང་ཆུབ་སེམས་རྒྱུད་ལ་སྐྱེ་བ་ལ་བྱམས་སྙིང་རྗེ་སྒོམ་དགོས་རེད། དང་པོ་བྱམས་སྙིང་རྗེ་རྒྱུད་ལ་སྐྱེ་ཐབས་ལ་རྒྱུ་འབྲས་མན་ངག་བདུན་དང་། བདག་གཞན་བརྗེ་བ་སོགས་ཐབས་མང་པོ་ཡོད་རེད། མདོར་ན་རང་རང་སོ་སོའི་བདེ་བ་འདོད་པ་དང་སྡུག་བསྔལ་མི་འདོད་པ་གང་ཡོད་པ་དེ་ལ་བསམ་བློ་ཐོངས། རང་ལ་བདེ་བ་འདོད་པ་དང་སྡུག་བསྔལ་མིི་འདོད་པ་ཧ་གོ་བའི་ཐོག་ནས་གཞན་ལའང་བདེ་བ་དང་བདེ་བའི་རྒྱུ་ལྡན་ན་སྙམ་པ་བྱམས་པ་དང་།  སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་ན་སྙམ་པ་དེ་སྙིང་རྗེ་རེད། དང་པོ་བྱམས་པ་དང་སྙིང་རྗེ་སྒོམ་དུས་ལས་སླ་བོའི་ཐོག་ནས་སྒོམ་དགོས་རེད། ཕ་མ་དང་དེ་བཞིན་གྲོགས་པོ་གྲོགས་མོ། ཁྱི་ཕྲུག་དང་ཞི་མི་སོགས་སེམས་ཐག་ཉེ་བའི་རིགས་དང་། སྡུག་བསྔལ་གྱིས་མནར་བའི་སེམས་ཅན་ལ་དམིགས་ཏེ་བདེ་བ་འདོད་པ་དང་སྡུག་བསྔལ་མི་འདོད་པར་བསམ་སྟེ་བློ་གོམས་པར་བྱ་དགོས། དེ་བྱམས་སྙིང་རྗེ་སྐྱེ་སླ་བའི་ཡུལ་ཞིག་ངོས་བཟུང་བ་རེད། ད་མཉམ་དུ་སྒོམ་རྒྱག་རྒྱུ་ཡིན། སྙིང་རྗེ་སྐྱེ་སླ་བ་ཞིག་སེམས་ལ་ཟུངས། དེའི་གང་ཟག་དེས་བདེ་བ་འདོད་ཀྱང་བདེ་བ་བསྒྲུབ་མི་ཤེས། སྡུག་བསྔལ་མི་འདོད་ཀྱང་དེའི་རྒྱུ་སྤངས་མི་ཤེས་པ་ཡིན་པར་ཡིད་ལ་ཟུངས། དེའི་གང་ཟག་དེ་བདེ་བ་དང་བདེ་བའི་རྒྱུ་དང་ལྡན། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་བསམ་ཏེ་སྒོམས། དེ་བཞིན་སེམས་ཅན་གཞན་ཡང་བདེ་བ་འདོད་པ་དང་སྡུག་བསྔལ་མི་འདོད་པ་ཡིན་ཙང་སེམས་ཅན་ཐམས་ཅད་ལ་དེ་ལྟར་བསམ་ཐུབ་ན་བྱམས་པ་ཚད་མེད་དང་སྙིང་རྗེ་ཚད་མེད་ཆགས་ཀྱི་ཡོད་རེད། དེ་བྱམས་སྙིང་རྗེ་བྱང་ཆུབ་སེམས་སྐྱེ་ཐབས་རེད། ད་ལྟ་ང་ཚོས་སེམས་ཅན་ཐམས་ཅད་སངས་རྒྱས་སར་འགོད་ཐུབ་ཐབས་ཡོད་མ་རེད་དེ་དེ་ལྟར་བྱ་གི་ཡིན་བསམ་པའི་བསམ་པ་རྒྱ་ཆེན་པོ་བསྐྱེད། དེ་ལྟར་ན་ཀུན་སློང་བྱང་ཆུབ་མཆོག་ཏུ་སེམས་བསྐྱེད་པ་རེད། ད་ལྟ་སྨོན་ལམ་འཚོགས་སྐབས་ཀྱང་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་ཆེད་དུ་ཡིན་བསམ་རིམ་གྱིས་སེམས་བསྐྱེད་ན་བྱང་ཆུབ་སེམས་རྒྱུད་ལ་སྐྱེས་པ་དེ་འདྲ་ཡོང་གི་རེད། བྱང་ཆུབ་སེམས་སྐྱེས་གྱུར་ན་སྐད་ཅིག་གི །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པའི་ཕྱག་བྱར་འགྱུར། །ཞེས་གསུངས་པ་ལྟར་བྱང་ཆུབ་སེམས་སྐད་ཅིག་གཅིག་སྐྱེས་ན་ཡང་ཕན་རླབས་ཧ་ཅང་ཆེན་པོ་ཡོད་པ་རེད། ཅེས་དང་། སྒོམ་གྱི་དངོས་གཞིའི་སྐོར་གསུང་དོན། 

ད་དངོས་གཞི་དམིགས་པ་མེད་པ་རེད། དེ་རིང་ཡང་ཞི་གནས་སྐོར་ཞུ་རྒྱུ་ཡིན། ཁ་སང་ཐུན་དང་ཐུན་མཚམས་ལ་ཉམས་ལེན་གནང་ཤོག་ཞུས་པ་ལྟར་ཉམས་ལེན་གནང་མཁན་ག་ཚད་ཡོད། ཡག་པོ་འདུག །དེ་རིང་ལུས་གནད་སྐོར་ཉུང་ཙམ་ཞུས་ན། ལུས་རྣམ་སྣང་ཆོས་བདུན་ཞུ་བ་དེ་ལ་ཐབས་ལམ་གྱི་ཆོས་བདུན་དང་། གྲོལ་ལམ་གྱི་ཆོས་བདུན་གཉིས་ཡོད་རེད། གྲོལ་ལམ་ཆོས་བདུན་ལ་རྐང་པ་རྡོ་རྗེ་སྐྱིལ་ཀྲུང་མ་བཅས་ནའང་ཆོག་པ་རེད། ཕྱག་མཉམ་བཞག་དང་ངལ་གསོ་གང་རུང་དང་། སྒལ་ཚིགས་དྲང་པོར་བསྲང་རྒྱུ་དེ་གལ་ཆེ་ཤོས་རེད། དཔུང་པ་རྒྱང་ལྷོད་རན་པ། མགྲིན་པ་བསྡམ་པ་ལྟ་བུ་མ་ཡིན་པར་ལྷོད་པོར་ཞོག །མཆུ་དང་སོ་མ་བསྡམ་ལྕེ་ཡ་རྐན་ལ་རེག་ཙམ་ལས་ལྷོད་པོར་ཞོག །མིག་བཅོས་མ་མ་ཡིན་པར་ལྷོད་པོར་ལྟོས། ལས་དང་པོ་བ་ལ་མིག་བཙུམ་ནའང་ཆོག །ནམ་རྒྱུན་གསུང་རྒྱུན་ལ་གཟུགས་པོ་དྲང་པོ་ཡིན་མིན་དེ་སྨིན་མཚམས་སུ་ཤིང་ཐོག་ཅིག་བཟུང་སྟེ་མར་མངག་ན་པང་ཐོག་ཏུ་ཐད་ཀར་ལྷུང་ན་འགྲིག་གི་ཡོད་རེད། 

ད་གདམ་ག་གཉིས་ཡོད། གདམ་ག་ཞུས་ན་ཐུགས་ལ་ངེས་པ་དང་མི་བརྗེད་པ་ཕན་ཐོགས་ཀྱི་རེད། དང་པོ་དྲན་པའི་སྐོར་དང་། གཉིས་པ་དྲན་པ་ཉམས་ལེན་གྱི་སྐོར་རེད། དང་པོ་ལྟ་བ་དང་གཉིས་པ་སྒོམ་པ་རེད། དེ་གཉིས་གང་ཞུ་ན་ཕྱག་རྐྱོངས་ཤོག །ལགས་སོ་ཉམས་ལེན་གནང་འདོད་ཡོད་འདུག །དྲན་པ་ཉེ་བར་བཞག་པ་བཞི་ནི་ལུས། ཚོར་བ། སེམས། ཆོས་དྲན་པ་ཉེ་བར་བཞག་པ་ཞེས་དཔེ་ཆའི་ནང་དུ་མང་པོ་གསུང་ཡོད་རེད། ལུས་ཚོར་སེམས་དང་ཆོས་རྣམས་ལ། །མཚན་ཉིད་གཉིས་སུ་ཡོངས་བརྟགས་པས། །ལུས་ཚོར་བ་སེམས་ཆོས་དེ་རྣམས་ལ་རང་གི་མཚན་ཉིད་དང་སྤྱིའི་མཚན་ཉིད་མི་རྟག་པ་ལ་སོགས་པ་དང་། ཞི་གནས་ཀྱི་ཆ་དང་སེམས་གཏིང་ནས་ཚོར་བ་དེ་མི་རྟག་པ་ཡིན་མིན་དེ་འདྲ་བསམ་དགོས་མ་རེད་ཚོར་བ་ངོ་ཤེས་ཙམ་འཇོག་རྒྱུ་རེད། ལྷག་མཐོང་སྐབས་ཚོར་བ་ཞེས་པ་དེ་མི་རྟག་པ་སྟོང་པ་བདག་མེད་པ་སོགས་ལ་བསམ་བློ་གཏོང་རྒྱུ་ཡོད་རེད། ཁ་སང་དྲན་པ་ངོ་སྤྲོད་ཞུས་པ་བཞིན་དྲན་པ་ཁོ་རང་གིས་ཁོ་རང་ངོས་ཟིན་ན་འགྲིག་གི་རེད། སྤྱིར་བཏང་ང་ཚོར་གསལ་ཞིང་རིག་པ་ཡོད་རེད་དེས་གསལ་ཞིང་རིག་པ་ཤེས་ན་ཏིང་ངེ་འཛིན་འགྱུར་གྱི་རེད། 

དྲན་པ་རྩལ་སྦྱང་དགོས་རེད། དེ་རིང་ལུས་དྲན་པ་ཉེར་བཞག་དང་ཚོར་བ་དྲན་པ་ཉེར་བཞག་གཉིས་མཉམ་དུ་ཞུ་རྒྱུ་ཡིན། ལག་པས་ཚ་གྲང་གང་འདུག་ཧ་གོ་བ་དེ་ཚོར་བ་དྲན་པ་ཉེ་བར་བཞག་པ་རེད། ཕྱག་ཐལ་མོ་སྦྱར་ཏེ་རེག་བྱ་ཧ་གོ་བར་གྱིས། ཤུགས་ཆེན་པོ་དགོས་མ་རེད་དྲན་ཙམ་དྲན་ཙམ་གྱིས། ཕྱག་འཕུར་འཕུར་གཏོང་ཚོར་བ་གང་ཡོད་ན་འགྲིག་གི་རེད་ཚོར་བ་མེད་ན་མེད་པ་དེ་ལ་སེམས་གཏོད། ལུས་དྲང་པོ་བསྲང་སྟེ་སྤྱི་གཙུག་ནས་རྐང་པའི་བར་ལུས་ཀྱི་གནས་རྣམས་སུ་རེ་རེ་ནས་ཚོར་བ་གང་འདུག་ན་དེ་ལ་སེམས་གཏོད། ཚོར་བ་མི་འདུག་ན་དེ་ག་རང་ཞོགས། དོན་དག་གང་བྱུང་ན་ཧ་གོ་བའི་ཐོག་ཏུ་བཞག་ན་ནོར་མ་ནོར་གང་ཡིན་ནའང་འགྲིག་གི་རེད། སྒོམ་གྱི་ངོ་བོ་དྲན་པ་རེད་དྲན་པས་ཟིན་པའི་སེམས་ལ་གང་ཤར་ན་འགྲིག་གི་རེད། དྲན་པ་ནི་ནམ་མཁའ་བཞིན་དུ་འགྱུར་བ་མེད་པ་ཞིག་རེད། དེ་བཞིན་བཟང་ངན་གྱི་རྟོག་ཚོགས་གང་བྱུང་ན་ནམ་མཁའི་སྤྲིན་ཚོགས་ནང་བཞིན་རེད། ད་སྤྱན་ཕྱེ་སྟེ་ཐུགས་རང་བབ་ངང་དུ་བཞུགས་རོགས། ད་ནང་༸སྐྱབས་རྗེ་རྒྱལ་ཚབ་རིན་པོ་ཆེས་ཚིག་ཉུང་ཉུང་དོན་འདུས་ཀྱི་སྒོམ་ཟབ་པོ་གནད་ལ་འཁེལ་བ་མན་ངག་དང་ཉམས་མྱོང་གི་གནད་དང་ལྡན་པ་དཔེ་ཟབ་པོ་ཞིག་གསུང་བྱུང་། ག་རེ་གསུང་བྱུང་ཟེར་ན་ཞི་གནས་དང་སྒོམ་གྱི་ཉམས་ལན་ངོ་མ་དེ་ལ། བློས་བྱས་རྩོལ་བའི་སྒོམ་གྱིས་མ་བསླད་ཅིང་། །ཐ་མལ་འདུ་འཛིའི་རླུང་གིས་མ་བསྐྱོད་པ། །མ་བཅོས་གཉུག་མར་རང་བབ་འཇོག་ཤེས་པའི། །སེམས་དོན་ཉམས་ལེན་མཁས་ཤིང་སྐྱོང་བར་ཤོག །དེ་ལ་ཞི་གནས་ཀྱི་སྒོམ་རྒྱག་སྟངས་ཞིབ་ཚགས་པོ་གནད་ཆ་ཚང་འདུས་པ་ཞིག་གསུང་བྱུང་། དེ་ཡིན་དུས་ཕྱག་ཆེན་ཉམས་ལེན་སྐྱོང་ཐབས་ལ་གནད་རྣམ་པ་གསུམ་དེ་མ་ཡེངས་མི་སྒོམ་བཟོ་མེད་གསུམ་རེད། ཕྱག་ཆེན་སྨོན་ལས་བློས་བྱས་རྩོལ་བའི་སྒོམ་གྱིས་མ་བསླད་ཅིང་གསུང་དུས་མ་སྒོམ། སྒོམ་རྒྱག་རྒྱུ་ཡོད་མ་རེད་གསུང་པ་རེད། ད་ང་ཚོ་ཞི་གནས་སྒོམ་དུས་སྒོམ་དགོས་ཡོད་མ་རེད། ཞི་གནས་སྒོམ་སྐབས་སེམས་ལ་གང་དྲན་བྱུང་ན་དེ་ག་རང་འཇོག་རྒྱུ་རེད། ལྷ་སྒོམ་པ་དང་འདྲ་གི་མ་རེད། ཕྱག་རྒྱ་ཆེན་པོ་སེམས་ལ་གང་ཤར་ན་དེ་རང་འཇོག་རྒྱུ་དང་མ་ཤར་ནའང་དེ་ག་རང་འགྲིག་གི་རེད། སངས་རྒྱས་ཀྱི་སྐུ་ལ་དམིགས་པའི་ཞི་གནས་ཞེས་པ་ཞིག་བསྒོམ་རྒྱུ་ཡོད་རེད་དེའང་སངས་རྒྱས་ཀྱི་སྐུ་གང་འདྲ་ཞིག་ཤར་ན་འགྲིག་གི་རེད། དེ་བཞིན་སྒོམ་ཟེར་དུས་ད་ནང་༸སྐྱབས་རྗེ་གཽ་ཤྲཱི་རྒྱལ་ཚབ་རིན་པོ་ཆེས་གསུང་བ་བཞིན་བདེ་བ་དང་། གསལ་བ་དང་། མི་རྟོགས་པ་ལ་སོགས་པ་བདེ་ཉམས་དང་འཇམ་ཉམས་མི་རྟོག་པའི་ཉམས་གསུམ་ཡོད་རེད།  ཞེན་པ་མེད་པའི་བདེ་ཆེན་རྒྱུན་ཆད་མེད། །མཚན་འཛིན་མེད་པའི་འོད་གསལ་སྒྲིབ་གཡོགས་བྲལ། །བློ་ལས་འདས་པའི་མི་རྟོག་ལྷུན་གྱིས་གྲུབ། །རྩོལ་མེད་ཉམས་མྱོང་རྒྱུན་ཆད་མེད་པར་ཤོག །གསུང་པ་བཞིན་བདེ་གསལ་མི་རྟོག་པའི་ཉམས་གསུམ་རེད་དེ་ཚོ་ལ་བཟོ་རྒྱུ་ཡོད་མ་རེད། སྒོམ་ཆེན་ཞིག་གིས་སྒོམ་རྒྱག་འོང་དུས་སེམས་པ་དེ་ལྷོད་ཤིག་ཤིག །བདེ་འབོལ་འབོལ་ཡོང་བ་དེ་འདྲ་རེད། ནུབ་ཕྱོགས་པས་སྒོམ་རྒྱག་དུས་བདེ་བོ་གསལ་པོ་ཞིག་བཟོ་ནས་གད་མོ་ཤོར་གྱི་མེད་ནའང་འཛུམ་ཤིག་ཤིག་བྱས་ཏེ་རྒྱག་གི་རེད། ཤར་ཕྱོགས་པས་སྒོམ་རྒྱག་དུས་སེམས་རྩེ་གཅིག་ཏུ་ནང་དུ་སྡུད་དེ་སྒོམ་རྒྱག་གི་རེད། གཡས་གཡོན་ནས་སྐད་རྒྱབ་ན་ངས་སྒོམ་རྒྱག་གི་ཡོད་སྐད་མ་རྒྱག་ཅེས་བཤད་ཀྱི་རེད་དེ་ཆེད་དུ་བསྒོམ་དགོས་མ་རེད། ད་ལྟ་ཆོས་ཐུན་དེ་ཙམ་ཡིན་གསོལ་ཇ་ཞིམ་པོ་བཞེས་རོགས། ཞེས་གསུང་སྟེ་ཉིན་གཉིས་པའི་ཉིན་རྒྱབ་ཀྱི་ཆོས་ཐུན་སྔ་མ་གྲོལ་སོང་། 

ཁོང་གིས་སྒོམ་ཁྲིད་ནི་སྒོམ་གྱི་སྐོར་ལ་ཆ་རྒྱུས་ཡོད་མཁན་ཡིན་ན་དེ་ལ་རྟོགས་པ་ན་འཕར་བ་དང་སྒོམ་གྱི་བོགས་འདོན་སོགས་ཕན་རླབས་ཆེ་བ་མ་ཟད། སྒོམ་ལ་ཐོག་མར་འཇུག་མཁན་ལས་དང་པོ་པ་རྣམས་ལའང་ཁ་གསལ་ཞིང་ཉན་བདེ་བ་སེམས་ལ་ངེས་སླ་བ། གོ་བརྡ་འཕྲོད་པ། སུ་ཡིན་ན་སེམས་ལ་བསམ་བློ་གཏོང་སའི་ཡུལ་རྙེད་པ་སོགས་དགེ་མཚན་དུ་མ་ལྡན་པ་ནི་ཁོང་གི་ཐུན་མིན་གྱི་ཁྱད་ཆོས་ཤིག་ཏུ་འཁུམས། 

ཐུབ་བསྟན་སྦྱིན་པ་ནས།