སྤྱི་ལོ་༢༠༢༥/༠༢/༠༩ སྔ་དྲོ།

འཕགས་ཡུལ་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་ཐེངས་སོ་དགུ་པའི་ཉིན་ལྔ་པའི་སྔ་དྲོ། སྤྱི་ལོ་ ༢༠༢༥/༠༢/༠༩ ཉིན་དགེ་འདུན་བཙུན་པ་དང་བཙུན་མ། དད་ལྡན་དགེ་བསྙེན་ཕ་མ་རྣམས་གཉིད་འོད་གསལ་ལས་བཀྲོག་པའི་འཁར་རྔ་རྡུང་པ་ལྷན་དུ་མལ་ལས་བཞེངས། ཁྲུས་དང་གཙང་སྦྲ་ལ་རོལ། གོས་ངུར་སྨྲིག་བགོས་ཏེ་རིམ་པར་སྨོན་ལམ་ཆོས་ར་ཆེན་མོར་གདན་འཛོམས་རྟིང་། ༧ སྐྱབས་རྗེ་ཟུར་མང་གར་དབང་རིན་པོ་ཆེས་ཐེག་ཆེན་གསོ་སྦྱོང་གི་སྡོམ་ལུང་གནང་། དེ་ནས་སྐྱབས་འགྲོ་སེམས་བསྐྱེད་ནས་བཟུང་ཞལ་འདོན་གསུང། གསོལ་ཇ་སྐབས་སྤྱི་ཁྱབ་ཆོས་ཁྲིམས་པ་མཁན་པོ་སྐལ་བཟང་ཉི་མ་མཆོག་གིས་བཀའ་འགྱུར་ཆོས་སྐོར་དང་། དག་སྒྲོག་གི་སྐོར་ལ་བཀའ་སློབ་ཕེབས་དོན། སངས་རྒྱས་བཅོམ་ལྡན་འདས་ཀྱིས། ལྔ་བརྒྱ་ཐ་མར་གྱུར་པ་ན། །ང་ཉིད་ཡི་གེའི་གཟུགས་སུ་གནས། །ང་ཡིན་སྙམ་པའི་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་གསུངས་པ་ལྟར་དུ། ང་རང་ཚོ་ཚེ་རབས་ཐོག་མེད་ནས་འཁོར་བའི་གནས་སུ་མ་རིག་པའི་མུན་པ་སྟུག་པོས་སྒྲིབ། ལས་དང་ཉོན་མོངས་པའི་གཞན་དབང་དུ་གྱུར་ནས་འཁྱམས་བསྡད་པའི་སྐབས་སུ། བླང་དོར་གྱི་མིག་ཕྱེ་མཁན་སྟོན་པ་ཡང་དག་པ་རྫོགས་པའི་སངས་རྒྱས་ཡིན་པ་དང། དེ་ཉིད་ད་ལྟ་ཞལ་དངོས་སུ་མ་བཞུགས་ཀྱང་། སྟོན་པའི་སྐུ་ཡི་སྐུ་ཚབ་གསུང་གི་གསུང་ཚབ་དེ་རྒྱལ་བའི་བཀའ་འགྱུར་རིན་པོ་ཆེ་འདི་ཉིད་ཡིན་ཞིང་། སྟོན་པ་སངས་རྒྱས་ཀྱིས་ལྔ་བརྒྱ་དུས་ཀྱི་ཐ་མ་ལ་ང་ཉིད་ཡི་གེའི་གཟུགས་སུ་གནས་གསུང་པས། ང་ཚོ་ལ་སངས་རྒྱས་ཀྱི་བླང་དོར་གྱི་གནས་ཆ་ཚང་ད་ལྟ་རྒྱལ་བའི་བཀའ་འགྱུར་རིན་པོ་ཆེ་འདི་ཡི་ཐོག་ནས་རྟོགས་ཐུབ་པ་ཡིན་དུས། འདི་ལ་སངས་རྒྱས་དངོས་ཀྱི་འདུ་ཤེས་བསྐྱེད་ནས་དགའ་དད་གུས་པ་ཆེན་པོས་སྒོ་ནས་མོས་པ་བྱེད་དགོས་རེད་པ་ཅེས་བཀའ་ཕེབ་དོན་ལྟར་དུ། བཀའ་འགྱུར་ཆོས་སྐོར་དང་དག་སྒྲོག་གནང་གིན་ཡོད་རེད། དེ་བཞིན་ཡུལ་ལ་ནད་ཡམས་དམག་འཁྲུག་ལ་སོགས་པ་བྱུང་སྐབས་བཀའ་འགྱུར་ཆོས་སྐོར་དང་དག་སྒྲོག་གནང་སྟེ་དེ་དག་ཞི་བའི་ལོ་རྒྱུས་ཀྱང་ཡོད་རེད། ལྷག་པར་དུ་༧ རྒྱལ་དབང་ཡིད་བཞིན་ནོར་བུའི་ཞལ་སྔ་ནས་བཀའ་གང་ཕེབས་ཡོད་རེད་ཟེར་ན། རྣམ་པ་ཚོ་བཀའ་འགྱུར་ཆོས་སྐོར་ལ་ཕེབས། གོམ་པ་རེ་རེ་སྤོ་བའི་སྐབས་སུ་སྔོན་ཆོས་རྒྱལ་ལོ་པཎ་རྣམས་རྒྱ་གར་འཕགས་པའི་ཡུལ་དུ་ཕེབས། དཀའ་བ་བརྒྱ་ཕྲག་དཔག་ཏུ་མེད་པ་སྤྱད། སངས་རྒྱས་ཀྱིས་གསུང་པའི་ཆོས་དེ་རྒྱ་གར་གྱི་སྐད་ནས་བོད་སྐད་ལ་བསྒྱུར། དེ་སོ་སོའི་ཕྲག་པ་ལ་ཁྱེར་ཏེ་ཧི་མ་ལ་ཡི་རྫ་རི་དང་བྲག་རི་བརྒལ། གཉན་འཕྲང་གི་ཉེན་ཁ་ལ་མ་འཛེམ་པར་གོམ་པ་རེ་རེ་བཞིན་དུ་རྒྱ་གར་འཕགས་ཡུལ་ནས་ཁ་བ་གངས་ཅན་ལྗོངས་དང་། དེ་བཞིན་རྒྱ་ནག་གི་ཡུལ། ཐེ་ལན་ཌི་ལ་སོགས་པ་འཛམ་གླིང་ཤར་ནུབ་ཀུན་ཏུ་དམ་པའི་ཆོས་དར་བ་མཛད་པ་ལྟར་རྣམ་པ་ཚོ་ཆོས་སྐོར་ལ་ཕེབས། གོམ་པ་རེ་རེ་བཞིན་དུ་སྤོ་བའི་སྐབས་སུ་སངས་རྒྱས་ཀྱི་བསྟན་པ་དེ་འཛམ་གླིང་ཡུལ་གྲུ་མཐའ་ཡས་པར་དར་ཞིང་རྒྱས་པར་སྤེལ་བའི་ཐུགས་སྨོན་རྒྱ་ཆེན་པོ་གནང་ནས་ཕེབས་ཡ་དང་། ཞལ་ནས་སངས་རྒྱས་ཀྱི་མཚན་སྔགས་བགྲང་གིན་བགྲང་གིན་ཕེབ་དགོས་ཞེས་༧ རྒྱལ་དབང་ཡིད་བཞིན་ནོར་བུས་ཇི་ལྟར་བཀའ་ཕེབས་པ་ལྟར། རྣམ་པ་ཚོས་ཀྱང་ཐུགས་བསྐྱེད་དང་སྨོན་ལམ་རྒྱ་གང་ཆེའི་སྒོ་ནས་ཕེབས་རོགས་གནང་ཞེས་སྐྱབས་འཇུག་དང་རེ་སྐུལ་ཞུ་ཡ་ཡིན། ཞེས་དང་། བཀའ་འགྱུར་ཀློག་འདོན་སྐབས་འཕྲོ་བརླག་དང་། ཆུད་ཟོས་སུ་མ་སོང་བ་གནང་དགོས་སྐོར་སོགས་༧ དཔལ་རྒྱལ་དབང་ཀརྨ་པའི་བཀའ་དགོངས་གཞི་བཟུང་གི་བཀའ་སློབ་ལམ་སྟོན་གནང་།

དེ་ནས་ཐུབ་ཆོག་དཔལ་གྱི་སྙིང་པོ་ལས། ཐུན་མོང་གི་སྔོན་འགྲོ་བཞི་ནས་རྟེན་འབྲེལ་སྙིང་པོའི་སྔགས་མ་གྲུབ་ཀྱི་བར་གསུང་མཚམས་སུ། ༧ སྐྱབས་རྗེ་ཟུར་མང་གར་དབང་རིན་པོ་ཆེ་དང་། ༧ སྐྱབས་རྗེ་ཡོངས་དགེ་མི་འགྱུར་རིན་པོ་ཆེ། ༧ སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ་རྣམ་པ་མཆོད་རྟེན་ལ་ཆིབས་བསྒྱུར་བསྐྱངས་སྐབས་རྡོར་གདན་བྱང་ཆུབ་མཆོད་རྟེན་འཛིན་སྐྱོང་ཚོགས་པས་བྱོན་བསུའི་མཇལ་དར་ཕུལ། ཆུ་ཚོད་བརྒྱད་པའི་ཐོག་རྟེན་མ་ཧཱ་བྷོ་དྷིའི་མཐོང་གྲོལ་སྐུ་བརྙན་གྱི་དྲུང་དུ་རོ་ནུས་ཕུན་སུམ་ཚོགས་པའི་ཤིང་ཏོག་དང་། སྐྱེ་འགྲོའི་འབྱུང་ཁམས་གསོ་བའི་སྨན་སྣ་རིགས་སྣ་ཚོགས་པས་བཀང་བའི་ལྷུང་བཟེད་འདེགས་འབུལ་ཞུས། རྟེན་མ་ཧཱ་བྷོ་དྷིའི་མཆོད་སྡོང་རིན་པོ་ཆེའི་བྱང་ཕྱོགས་ནས་དབུ་བཙུགས་ཏེ། གདན་ས་རུམ་བཏེག་བཤད་སྒྲུབ་ཆོས་འཁོར་གླིང་གི་ཆོས་ཁྲིམས་པས་དྲི་ཞིམ་སྤོས་ཀྱིས་སྣེ་ཁྲིད་དེ་སྙན་འཇེབས་ཀྱིས་སྙན་དབང་གསོ་བའི་དུང་རྒྱ་གླིང་དང་བཅས། ༧ སྐྱབས་རྗེ་ཟུར་མང་གར་དབང་རིན་པོ་ཆེ་དང་། ༧ སྐྱབས་རྗེ་ཡོངས་དགེ་མི་འགྱུར་རིན་པོ་ཆེ། ༧ སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ་རྣམ་པས་བདུག་སྤོས་ཀྱིས་མདུན་བསུས། གདན་ས་རུམ་བཏེག་གི་སྒྲུབ་དཔོན་དང་རྡོར་སློབ། དེ་བཞིན་མཆོག་གི་སྤྲུལ་སྐུ་རྣམ་པ། མཁན་པོ་དགེ་བའི་བཤེས་གཉེན་དང་དགེ་སློང་། དགེ་སློང་མ་རྣམ་པས་རྒྱལ་བའི་བཀའ་འགྱུར་རིན་པོ་ཆེ་གླེགས་བམ་རེ་རེ་བཞིན་ཕྲག་ཏུ་བསྣམས་ཏེ། ཞལ་ནས་ཐུབ་མཆོག་དོན་ཀུན་གྲུབ་པའི་མཚན་སྔགས་དབྱངས་སུ་གྱེར་བཞིན་ཆོས་གོས་གསུམ་གྱིས་ལུས་བརྒྱན་པས་མཛེས་ཤིང་ཡིད་དབང་འཕྲོག་པ། མཐོང་ན་མི་མཐུན་པར་མེད་པ་དད་ལྡན་དང་བ་འདྲེན་པའི་ཞི་དུལ་བག་ཕེབས་ཀྱིས་ངང་ནས་མཆོད་རྟེན་ཆེན་མོའི་ཕྱི་སྐོར་ལ་ཕེབས།

ལམ་གྱི་གཡས་གཡོན་དུ་དད་ལྡན་ཆོས་ཞུ་བ་རྣམས་ཕྲེང་བསྒྲིགས་ཏེ་ལག་ཏུ་ལྷ་དར་དཀར་པོ་དང་། ཡིད་དུ་འོང་བའི་མེ་ཏོག་སྣ་ཚོགས། དྲི་ཞིམ་གྱི་བདུག་སྤོས་སོགས་མཆོད་པའི་ཡོ་བྱད་སྣ་ཚོགས་པ་ཐོགས་ཏེ་ངག་ནས་གསོལ་འདེབས་བྱེད་བཞིན། ལ་ལས་རྒྱལ་བའི་བཀའ་འགྱུར་རིན་པོ་ཆེ་དང་བླ་མ་རྣམ་པ་ལས་བྱིན་རླབས་ཞུ། ལ་ལས་མེ་ཏོག་སྣ་ཚོགས་མཁའ་ལ་གཏོར་ཏེ་མེ་ཏོག་གིས་ཆར་བབས་པ་ལྟ་བུ་བྱེད། ལ་ལས་དད་པའི་ཕྱག་རྒྱ་ལས་དར་དང་མེ་ཏོག་སྙིམ་པར་བཅང་སྟེ་རྩེ་གཅིག་ཏུ་གསོལ་བ་འདེབས། ལ་ལས་དད་གུས་སྤྲོ་གསུམ་གྱི་ངང་ནས་བླ་མ་རྣམ་པའི་སྐུ་དང་། རྒྱལ་བའི་བཀའ་འགྱུར་ལ་མེ་ཏོག་འཐོར་བཞིན་ཤིས་ཚིག་བརྗོད། དེ་བཞིན་རྒྱལ་བསྟན་དར་ཞིང་འགྲོ་ཀུན་བདེ་བའི་གསོོལ་འདེབས་སྨོན་ལམ་སོགས་སོ་སོས་དད་གུས་མཚོན་པའི་བྱ་བ་སྣ་ཚོགས་བྱེད་ཅིང་དགེ་སློང་རྣམས་གཤེགས་པའི་རྗེས་སུ་དལ་གྱིས་སྙེགས། རྒྱལ་བའི་བཀའ་འགྱུར་ཆོས་སྐོར་བསྐོར་བ་གཅིག་འཁོར་མཚམས་རྟེན་མ་ཧཱ་བྷོ་དྷིའི་བྱང་ཆུབ་ལྗོན་ཤིང་གི་དྲུང་ནས་གྲུབ་པར་བགྱིས། དེར་སྐྱབས་རྗེ་རིན་པོ་རྣམ་པ་དབུས་པས་དགེ་འདུན་པ་རྣམས་ཀྱིས་ངེས་དོན་ཕྱག་རྒྱ་ཆེན་པོའི་སྨོན་ལམ་སོགས་བསྔོ་བ་སྨོན་ལམ་གྱིས་མཇུག་བསྡུས། ༧ སྐྱབས་རྗེ་རིན་པོ་ཆེ་རྣམ་པ་དང་དགེ་འདུན་པ་རྣམས་སྨོན་ལམ་ཆེན་མོའི་ཆོས་རར་ཕྱིར་ཕེབས་གནང་སྟེ་ཆུ་ཚོད་དགུ་དང་ཕྱེད་ཀྱི་ཐོག་ཐུབ་བསྟོད་སོགས་འདོན་པ་སྔོན་སོང་གི་རྒྱལ་བའི་བཀའ་འགྱུར་རིན་པོ་ཆེའི་གླེགས་བམ་རྣམས་ཆ་བགོས་ཀྱིས་དག་ཀློག་གི་དབུ་ཚུགས། ཆུ་ཚོད་བཅུ་གཅིག་དང་ཕྱེད་ནས་རྒྱལ་བའི་བཀའ་འགྱུར་ཡོངས་རྫོགས་དག་སྒྲོགས་ལེགས་པར་གྲུབ་ཟིན་ནས་ཉིན་གུང་གསོལ་ཚིགས་གྲོལ།

རྒྱལ་བའི་བཀའ་འགྱུར་ཀློག་པའི་ཕན་ཡོན།
ཐར་མདོ་ལས། འབྲུ་གཅིག་གམ། ཚིག་གཅིག་གམ། ཚིགས་བཅད་གཅིག་འཆང་ངམ་ཀློག་ན་བསོད་ནམས་འདི་ལྟ་བུ་དང་ལྡན་པར་འགྱུར་རོ།། འདི་ལྟ་སྟེ། གང་གིས་མདོ་སྡེ་འདི་འཛིན་ཡང་། །སྡུག་བསྔལ་ཀུན་དང་ཡོངས་འབྲལ་ལོ། ནམ་དུའང་ངན་འགྲོར་མི་ལྟུང་སྟེ། །བདེ་བའི་གནས་སུ་ཕྱིན་པར་འགྱུར། ། ཞེས་ཚིགས་བཅད་གཅིག་འཛིན་པའམ། མདོ་སྡེ་འཛིན་པའི་གང་ཟག་རྣམས་སྡུག་བསྔལ་ལས་གྲོལ་ཏེ་ངན་འགྲོར་མི་ལྟུང་ཞིང་བདེ་ནས་བདེ་བར་བགྲོད་པ་དང་། དབུས་མཐའ་རྣམ་འབྱེད་ལས། ཡི་གེ་བྲི་མཆོད་སྦྱིན་པ་དང་། །ཉན་དང་ཀློག་དང་ལེན་པ་དང་། །འཆད་དང་ཁ་བཏོན་བྱེད་པ་དང་། །དེ་སེམས་པ་དང་བསྒོམ་པའོ། །སྤྱོད་པ་དེ་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཞེས་ཆོས་སྤྱོད་བཅུའི་ནང་ཚན་དུ་ཆོས་ཉན་པ་དང་། ཀློག་པ། ཁ་བཏོན་བྱེད་པ་སོགས་ཀྱི་བསོད་ནམས་ཀྱི་ཕུང་པོ་ནི་རྒྱ་ཆེ་ལ་དཔག་ཏུ་མེད་པ་ཡོད་པ་ཡིན་པར་གསུངས།

འཕགས་པ་སྒོ་མཐའ་ཡས་པས་བསྒྲུབ་པ་ཞེས་བྱ་བའི་གཟུངས་ལས།
མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་གཟུང་དང་བཀླགས་པ་ཡིས། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལས་ཀྱང་དད་པ་བསམ་ཡས་རྙེད། །མདོ་སྡེ་ཟབ་མོ་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མངོན་འཚང་རྒྱ། །ཞེས་སངས་རྒྱས་ཀྱིས་གསུང་པའི་མདོ་སྡེ་རྣམས་ཐོས་ནས་རྗེས་སུ་ཡི་རང་དང་། ཡི་གེ་བྲིས་པ་དང་། གཟུངས་བཀླགས་པ་སོགས་བྱས་སོ་སྐྱེ་ཕལ་པས་བློ་ཡུལ་ལས་འདས་པའི་བསོད་ནམས་ཐོབ་པ་དང་། མདོ་སྡེའི་དོན་ཤེས་ཤིང་མྱུར་དུ་མངོན་པར་རྫོགས་པ་འཚང་རྒྱ་བ་ཡིན་པར་གསུངས།

ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལས།
རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་བྱས་ཏེ་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཚུལ་བཞིན་དུ་ཡིད་ལ་བྱེད་པ་དང་། བྲིས་ཤིང་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་།གདུགས་དང་། རྒྱལ་མཚན་དང་། བ་དན་དང་། སིལ་སྙན་སྣ་ཚོགས་ཀྱིས་རིམ་གྲོར་བྱེད། བཀུར་སྟིར་བྱེད། ཕུ་དུད་དུ་བྱེད། མཆོད་པར་བྱེད་ན། དེའི་བསོད་ནམས་ཆེས་མང་དུ་འཕེལ་ལོ། །ཞེས་དང་།
དམ་པའི་ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། ཆོས་ཀྱི་རྣམ་གྲངས་འདི་འཛིན་ཏམ། སྟོན་ཏམ། རབ་ཏུ་འཆད་དམ། ཡི་གེར་འདྲིའམ། ཀློག་ན། ཡིད་ཀྱི་ལས་ཀྱི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཞིང་ཡིད་ཀྱི་དབང་པོ་ཡོངས་སུ་དག་པར་འགྱུར་རོ། །དེ་ཡིད་ཀྱི་དབང་པོ་ཡོངས་སུ་དག་པ་དེས། ཐ་ན་ཚིགས་སུ་བཅད་པ་གཅིག་ཐོས་པས་ཀྱང་དེའི་དོན་མང་པོར་ཤེས་སོ། །ཞེས་མདོ་རྒྱུད་བྱེ་བྲག་པ་རེ་བཀླགས་པས་ཀྱང་བསོད་ནམས་དཔག་ཏུ་མེད་པ་ཐོབ་པར་གསུང་ཞིང་། རྒྱལ་བའི་བཀའ་འགྱུར་རོ་ཅོག་བཀླགས་པའི་དགེ་རྩ་ནི་བརྗོད་ལས་འདས་པ་ཡིན་པ་སྨོས་མ་དགོས་པ་ཡིན་ནོ། །

ཞེས་གནས་ཚུལ་སྙིང་བསྡུས་སུ་ཐུབ་བསྟན་སྦྱིན་པས་སྤྱི་ལོ་ ༢༠༢༥/ ༠༢ /༠༩ ཉིན་བྲིས་པའོ། །

སྤྱི་ལོ་༢༠༢༥ སྤྱི་ཟླ་ ༠༢ སྤྱི་ཚེས་ ༠༨ ཀྱི་དགོང་མོའི་ཆུ་ཚོད་༧: ༠༠ པའི་སྟེང་བཀའ་བརྒྱུད་སྨོན་ལམ་ཆེན་མོའི་ཆོས་རར་༧རྒྱལ་ཀུན་འཕྲིན་ལས་ཀྱི་སྙིང་པོ་མཚན་དཔེ་གཟི་བྱིན་གྱི་གཟུགས་སུ་སྣང་བ་༧དཔལ་རྒྱལ་དབང་ཀརྨ་པ་བཅུ་བདུན་པ་ཆེན་པོའི་ཐུགས་ཀྱི་དགོངས་པ་གཞིར་བཟུང་རྒྱ་བལ་འབྲུག་གསུམ་ནས་ཕེབས་པའི་བཀའ་བརྒྱུད་པའི་བཤད་གྲྭ་ཁག་གི་སློབ་གཉེར་བ་རྣམ་པས་འཚོགས་གནང་སོང་།

ཐེངས་འདིའི་ཚོགས་མགོན་དུ་༧སྐྱབས་རྗེ་མི་འགྱུར་རིན་པོ་ཆེ་ཁྲ་འགུ་ཆོས་རྗེ་བླ་མས་གཙོས་བཀའ་བརྒྱུད་པའི་མཁན་པོ་རྡོར་སློབ་དབུ་ཆོས་རྣམ་པ་དང་། ད་ལན་གཙོ་སྐྱོང་བ་འབོ་དཀར་བཤད་གྲྭའི་མཁན་པོ་ཀརྨ་བསྟན་པ་རྣམ་དག་ཡིན་ཞིང་། ཁོང་གིས་གསུང་དོན་ལ། རྩོད་གླེང་སྐོར་རྩོད་གླེང་ཐེངས་དང་པོའི་སྐབས་སུ་གཙོ་སྐྱོང་བས་གསུང་པ་ལས་ལོགས་སུ་བཤད་རྒྱུ་གང་ཡང་མེད། ཡིན་ན་ཡང་ད་ཐེངས་རྩོད་གླེང་གི་བརྗོད་གཞི་འདི་ལོ་རྒྱུས་དང་འབྲེལ་བ་ཆེན་པོ་ཡོད་ཙང་ཐོག་མར་ང་ཚོས་མཁྱེན་དགོས་པ་ཞིག་ནི་ལོ་རྒྱུས་སྐབས་སུ་ས་གནས་དུས་ཚོད་ཚུལ་ཇི་ལྟར་བྱུང་བའི་སྐོར་རྣམས་གལ་ཆེན་པོ་ཡིན་པ་དང་། ད་དུང་རྩོད་གླེང་གི་སྐབས་འདུ་ཤེས་ཡང་དགེ་བའི་ཕྱོགས་སུ་བསྒྱུར་ཐུབ་པ་ཞིག་བྱུང་ན་དགེ་མཚན་ཆེ་ཚུལ་སོགས་གསུང་གནང་སོང་།

རྩོད་གླེང་གནང་མཁན་ལ་སྡེ་ཚན་གཉིས་སྒྲུབ་ཕྱོགས་ནས། རུམ་བཏེག་བཤད་གྲྭ། བསོད་ནམས་དར་བཤད་གྲྭ། ལ་བྷ་བཤད་གྲྭ། ཟུར་མང་བཤད་གྲྭ། དགག་ཕྱོགས་ནས། ཤེས་རབ་གླིང་བཤད་གྲྭ། ཁྲ་འགུ་བཤད་གྲྭ། ལེགས་བཤད་གླིང་བཤད་གྲྭ། འབྲུག་ཉི་ལྡེ་བཤད་གྲྭ།

སྤྱིར་གཏང་བརྗོད་གཞི་འདི་རྩོད་གཞི་ཅན་ཞིག་ཡིན་པ་དང་། སྒྲུབ་ཕྱོགས་པ་རྣམས་ཀྱིས་སྔར་ནས་ཡོངས་སུ་གྲགས་པའི་གནའ་དེང་གི་མཁས་པ་མང་པོས་ཐོན་མིས་བོད་ཡིག་གསར་བཟོ་ཡིན་པའི་རྒྱབ་སྐྱོར་སྒྲུབ་བྱེད་ཀྱི་ལུང་། གསལ་བྱེད་ཀྱི་རིགས་པ། མཚོན་བྱེད་ཀྱི་དཔེ། བརྡ་དོན་དཔངས་རྟགས་དང་བཅས་པ་བགྲངས་ནས་ཐོན་མིས་རྒྱ་གར་གྱི་ཡི་གེ་ལ་གཞི་བཅོལ་ཏེ་བོད་སྐད་ཀྱི་སྒྲ་གདངས་དང་མཐུན་པའི་ཡི་གེ་གསར་བཟོ་མཛད་ཚུལ་དང་། དེ་ལ་བརྟེན་ནས་བོད་བརྒྱུད་ནང་བསྟན་གྱི་གཞུང་ལུགས་རྣམས་བོད་ཡིག་ཐོག་ཏུ་བསྒྱུར་བར་ཕན་ཐོགས་ཆེན་པོ་བྱུང་ཡོད་ཚུལ་སོགས་སྒྲུབ་གནང་སོང་།
དེ་བཞིན་དགག་ཕྱོགས་པ་རྣམ་པས་ཀྱང་ཐོན་མིས་བོད་ཡིག་གསར་བཟོ་མཛད་མིན་པར་སྔ་མོ་ནས་ཡོད་པའི་ཡི་གེ་ཞིག་ཡར་རྒྱས་བཏང་བ་ཙམ་ཡིན་པའི་དགག་པ་མཛད་དེ། མཁས་པའི་དབང་པོ་འགའ་ཤས་ནས་གསར་བཟོ་མིན་པའི་རྒྱབ་སྐྱོར་ལུང་རིག་པ་དཔངས་རྟགས་བཅས་བགྲངས་གནང་ནས་ཏུན་ཧོང་ནས་ཐོན་པའི་ཡིག་རྙིང་དང་། ཞང་ཞུང་གི་ཡི་གེ་སྨར་ཡིག་སོགས་ཀྱི་དཔང་རྟགས་ཡོད་ཚུལ་གསུང་གནང་སོང་། མདོར་ན་རྩོད་གླེང་འདིའི་སྐབས་སུ་ཕྱོགས་གཉིས་ཀས་ལོ་རྒྱུས་ཡིག་ཆ་དང་རྒྱ་གར་ཡིག་གཟུགས། བོད་ཀྱི་ཡིག་གཟུགས་རྙིང་པ་སོགས་དཔེ་མཚོན་མང་པོ་དྲངས་ཏེ་རྩོད་གླེང་ཟབ་རྒྱས་གནང་བ་དེས་ཐོན་མིས་བོད་ཡིག་གསར་བཟོས་ཡིན་མིན་ཐོག་བོད་ཡིག་གི་འབྱུང་ཁུངས་དང་འཕེལ་རིམ་སྐོར་ལ་གོ་རྟོགས་གསར་པ་མང་པོ་ཞིག་རྙེད་རྒྱུ་བྱུང་།

མཐའ་དོན་རྩོད་གླེང་བ་གཉིས་རེ་ནས་མཇུག་སྡོམ་གསུང་བཤད་གནང་ནས་རྩོད་གླེང་དགའ་སྤྲོའི་ངང་མཇུག་ལེགས་པར་གྲུབ། དེ་ནས་རྩོད་གླེང་གནང་མཁན་རྣམ་པར་བཀའ་བརྒྱུད་སྨོན་ལམ་ཆེན་མོའི་འགན་འཛིན་བླ་མ་ཆོས་གྲགས་ནས་མཇལ་དར་ཉིན་མོ་བདེ་ལེགས་གནང་། ༧སྐྱབས་རྗེ་མི་འགྱུར་རིན་པོ་ཆེ་ལ་མཇལ་དར་ཕུལ་ནས་རིན་པོ་ཆེ་དང་ལྷན་དུ་སྐུ་པར་སྒྲོན་ཏེ་མཇུག་གྲུབ་གནང་སོང་།
བཀའ་བརྒྱུད་སྨོན་ལམ་སོ་དགུ་པའི་གནས་ཚུལ་ཕྱོགས་བསྡུས་པ་ཀརྨ་བསོ་རྒྱལ་པས། ༨/༠༢/༢༠༢༥

དེ་ཡང་ཕྱི་ལོ་ ༢༠༢༥ ཟླ་བ་ ༢ ཚེས་ ༨ ཀྱི་སྔ་དྲོོ་ཆུ་ཚོད ༦ ཐོོག་སྨོན་ལམ་ཆེན་མོར་མཉམ་ཞུགས་མཛད་པའི་སེར་སྐྱ་མི་དམངས་ཡོངས་སྨོན་ལམ་ཆེན་མོོའི་ཆོས་རྭར་འདུས་ཤིང་། ཚོགས་བཅར་བ་ཡོངས་སོ་སོའི་གྲལ་ལ་འཁོད་རྟིང་༧སྐྱབས་རྗེ་ཟུར་མང་གར་དབང་རིན་པོ་ཆེ་མཆོག་ནས་ཐེག་པ་ཆེན་པོ་གསོ་སྦྱོང་གི་སྡོམ་པ་བསྩལ། དེ་ནས་དབུ་མཛད་ཆེན་མོ་དབུས་པའི་དགེ་འདུན་འདུས་པ་ཡོངས་ནས་ནམ་རྒྱུན་བཞིན་ལེགས་སྦྱར་གྱི་སྐད་ཐོག་ནས་སྐྱབས་འགྲོ་དང་དཀོན་མཆོག་རྗེས་དྲན་འདོན་པ་རྣམས་གསུང་པའི་སྒོ་ནས་སྨོན་ལམ་གྱི་སྔ་དྲོའི་ཐུན་དང་པོ་དབུ་ཚུགས། ༧སྐྱབས་རྗེ་ཟུར་མང་གར་དབང་རིན་པོ་ཆེ་མཆོག་བཀའ་བརྒྱུད་སྨོན་ལམ་ཆེན་མོའི་ཉིན་རེ་མཛད་རིམ་ལྟར། རྡོར་གདན་བྱང་ཆུབ་མཆོད་རྟེན་ཆེན་མོའི་མདུན་དུ་ཕེབས་ནས་ཐུབ་པའི་དབང་པོའི་སྐུ་བརྙན་མཐོང་གྲོལ་རིན་པོ་ཆེར་ན་བཟའ་ཕུལ་ཅིང་ལྷུང་བཟེད་བཀང་བར་མཛད།

སྔ་དྲོའི་ཆུ་ཚོད་ ༩ པའི་ཐོག་༧རྒྱལ་དབང་མཆོག་གི་ཐད་གཏོང་དྲ་རྒྱ་བརྒྱུད་ནས་གསུང་ཆོས་ཉིན་མཐའ་མ་དབུ་ཚུགས་ཡོད། ཐོག་མར་བྱང་སྡོམ་བརྒྱུད་འདེབས་དང་མནྜལ་གྱི་ཞལ་འདོན་གསུང་ཅིང་། དད་ལྡན་སྦྱིན་བདག་སེར་སྐྱ་དུ་མ་ཞིག་ནས་མནྜལ་སྐུ་གསུང་ཐུགས་རྟེན་འདེགས་འབུལ་ཞུས།

དེ་ནས་རྒྱལ་དབང་མཆོག་ནས། ཉིན་སྔ་མའི་གསུང་ཆོས་ཀྱི་འཕྲོས་ནས་མར་དབུ་འཛུགས་གནང་། དེ་ཡང་ཉིན་དེའི་བཀའ་ཆོས་ཀྱི་སྙིང་དོན་བསྡུས་པ་འདི་ལྟར་།

ཇོ་བོ་རྗེ་མཐོ་ལྡིང་གི་གཙུག་ལག་ཁང་ལ་ཕེབས་ཤིང་ལྷ་བླ་མ་བྱང་ཆུབ་འོད་ཀྱིས་ཆོས་རྒྱལ་མེས་དབོན་རྣམ་གསུམ་གྱིས་སངས་རྒྱས་བསྟན་པ་བཙུགས་ཚུལ། གླང་དར་མས་བསྟན་པ་བསྣུབས་ཚུལ། ལྷ་བླ་མ་ཡེ་ཤེས་འོད་སོགས་མེས་པོ་རྣམས་ཀྱིས་བསྟན་པ་སླར་ཡང་བཙུགས་རྒྱུའི་ཐུགས་འདུན་ཡོད་ནའང་། ལྟ་སྤྱོད་ལོག་པ་དུ་མ་ཡོད་པས་བསྟན་པ་ལེགས་པར་བཙུགས་མི་ཐུབ་པའི་སྐུ་ངལ་རྣམས་ལོ་རྒྱུས་རྒྱས་པར་ཞུས། དོན་གཙོ་བོ་ནི་བྱང་ཆུབ་འོད་ཀྱིས་ཇོ་བོ་རྗེ་ལ་ཆོས་ཟབ་མོ་ཟབ་མོ་བཤད་པ་ལས་ལས་རྒྱུ་འབྲས་སྐོར་གསུངས་ཞེས་བསྐུལ་བ་བཞིན། ཇོ་བོ་རྗེས་བོད་པ་རྣམས་ལ་ལས་རྒྱུ་འབྲས་ཆོས་གསུངས་པས་མཚན་ལའངརྒྱུ་འབྲས་པ་ཞེས་ཐོགས་པར་གསུངས།

དེའི་སྐབས་ལོ་ཙྭ་བ་རིན་ཆེན་བཟང་པོས་ཀྱང་བོད་པའི་མི་རྣམས་ལ་ཇོ་བོ་རྗེ་བོད་དུ་ཡུན་རིང་དུ་མི་བཞུགས་པས་ཆོས་གང་ཞུ་རྒྱུ་ཡིན་ནའང་ཞུས་ཞེས་བསྐུལ་མ་དྲག་པོ་མཛད་པ་དང་། དེ་བཞིན་ལྷ་བླ་མ་བྱང་ཆུབ་འོད་ཀྱིས་ཀྱང་འབུལ་བ་དུ་མ་ཕུལ་ཅིང་། དེ་སྐབས་ཀྱི་བསྟན་པ་ནང་ཕན་ཚུན་མི་མཐུན་པ་མང་དུ་ཡོད་པས་དོགས་པ་དང་ཐེ་ཚོམ་རྣམས་རྗེ་བོ་རྗེ་ལ་འདྲི་བ་ཞུས་པ་དང་། འདྲི་བ་དེ་དག་ནི་ཐེག་པ་ཐུན་མོང་གི་འདྲི་བ་གཉིས། ཕ་རོལ་ཕྱིན་པའི་འདྲི་བ་གཉིས། གསང་སྔགས་ཀྱི་འདྲི་བ་གསུམ་སོགས་འདྲི་བ་མཛད། སངས་རྒྱས་བསྟན་པའི་དོན་ཡོངས་སུ་རྫོགས་པར་སྟོན་པའི་གཞུང་ཚིག་ཉུང་ལ་དོན་བསྡུས་པ། ཇོ་བོ་རྗེ་ཁྱེད་རང་གི་ཐུགས་ཉམས་མྱོང་ལ་ཇི་ལྟར་ཡོད་པ་དང་འབྲེལ་བའི་གཞུང་ཞིག་དང་། རྒྱུད་གསང་བ་སྙིང་པོའི་སྒྲུབ་ཐབས་ཤིག་ཅེས་མཛད་པར་གསོལ་འདེབས་བྱས། དེ་ལ་བརྟེན་ནས་ཇོ་བོ་རྗེས་བྱང་ཆུབ་ལམ་གྱི་སྒྲོན་མའི་གཞུང་མཛད། གཞུང་དེ་ལ་ཤོ་ལོ་ཀ་ ༦༧ ཡོད། གཞུང་དེ་ལ་བརྟེན་ནས་བོད་ལ་ཡོད་པའི་ཆོས་ལོག་པ་དང་སྔགས་ལོག་པ་རྣམས་སྐུ་དངོས་ཀྱིས་ཚར་གཅོད་མི་དགོས་པར་རང་བཞིན་ཞི་སོང་བ་སོགས་ཤུགས་རྐྱེན་ཆེན་པོ་བྱུང། བྱང་ཆུབ་ལམ་གྱི་སྒྲོན་མ་གཞུང་དེ་ཇོ་བོ་མཛད་པའི་རྗེས་སུ་དགེ་བཤེས་འབྲོམ་སྟོན་པས་ཐུགས་ཉམས་སུ་ལེན། ཐུགས་རྒྱུད་ལ་འཁྲུངས། གཞན་ལ་བཤད་པ་ལ་བརྟེན་ནས་འགྲོ་དོན་རྒྱ་ཆེན་པོ་བྱུང་བ་སྐོར་ཞིབ་རྒྱས་གསུངས།

སྔར་ཇོ་བོ་རྗེ་བོད་ལ་ཕེབས་དུས་ནག་ཚོ་ལོ་ཙ་བས་སྔར་རྒྱ་གར་གྱི་བྰི་ཀྲམ་ཤཱི་ལའི་གནས་བརྟན་ལ་དམ་བཅའ་བྱས་པ་ནང་བཞིན་ལོ་གསུམ་ཚར་བ་དང་རྒྱ་གར་ལ་ཕེབས་རྒྱུའི་ལམ་ཁ་པུ་རང་དུ་ཕེབས། པུ་རང་ལ་སྔར་སྒྲོལ་མའི་ལུང་བསྟན་ལ་སློབ་མ་ཁྱིམ་པ་གཅིག་ལ་ཕན་ཐོགས་པར་གསུངས་པ་བཞིན། པུ་རང་ལ་འབྲོམ་སྟོན་པ་དང་མཇལ་བ་ཡིན། འབྲོམ་སྟོན་པ་ཁམས་ལ་བཞུགས་ཚེ་ཇོ་བོ་རྗེའི་སྙན་པ་གསན་པས་པུ་རང་ཕྱོགས་སུ་ཕེབས་ནས་སྦྱིན་བདག་གཅིག་གི་ཁྱིམ་ཞིག་ཏུ་ཇོ་བོ་རྗེ་མཇལ། མཇལ་བའི་ཚེ་ཇོ་བོ་རྗེའི་ཕྱག་འབྲོམ་སྟོན་པའི་དབུ་ལ་བཞག་ནས་ལེགས་སྦྱར་གྱི་སྐད་ཐོག་ནས་བཀྲ་ཤིས་པའི་ཚིག་དུ་མ་བརྗོད། ཐེངས་དང་པོ་མཇལ་ནས་བཟུང་དཔོན་སློབ་གཉིས་གཟིམ་ཁང་གཅིག་གི་ནང་ལ་བཞུགས། སྤྱིར་ཁྱིམ་པ་དང་རབ་བྱུང་ལྷན་དུ་བཞུགས་མི་ཆོག་པ་གསུང་སྲོལ་ཡོད་ཀྱང་། ཇོ་བོ་རྗེ་ཕལ་ཆེན་སྡེ་པའི་ལུགས་ཡིན་པས་སྡེ་པ་དེའི་ལུགས་ལ་ཁྱིམ་གཅིག་གི་ནང་ལ་རས་ཡོལ་བ་ཞིག་རྒྱབ་ན་ལྷན་དུ་སྡོད་ཆོག་པར་གསུང་སྲོལ་ཡོད་པར་གསུངས།

དེ་ཡི་རྗེས་སུ་ནག་ཚོ་ལོ་ཙ་བས་སྔར་གྱི་དམ་བཅའ་བཞིན་ཇོ་བོ་རྗེ་རྒྱ་གར་ལ་སྐྱེལ་དགོས་པས། འོན་ཀྱང་བལ་ཡུལ་ལ་དམག་འཁྲུག་བྱུང་ཕེབས་མ་ཐུབ་པ་གྱུར། ལོ་ཙ་བ་ཐུགས་ཁྲེལ་བྱུང་བས་ཇོ་བོ་རྗེས་ཐུགས་གསོ་མཛད་ཅིང་རྒྱ་གར་ལ་ལམ་ཁའི་གནས་སྟངས་ཀྱི་འཕྲིན་དང་ཇོ་བོས་མཛད་པའི་བསྟན་བཅོས་ལམ་སྒྲོན་གྱི་ཕྱག་དཔེ་དང་གསེར་ཉུང་ཤས་བཅས་བསྐུར། འབྲོམ་སྟོན་པས་ཐབས་མཁས་པོའི་སྒོ་ནས་དབུས་གཙང་ཕྱོགས་ཀྱི་བསྟན་པའི་གནས་ཚུལ་རྣམས་ཞིབ་པར་ཞུས་ཏེ་ཇོ་བོ་རྗེ་ཕེབས་རྒྱུའི་ཐུགས་འདོད་བྱུང་བ་ན། དབུས་གཙང་ཕྱོགས་ཀྱི་བླ་ཆེན་མི་ཆེན་རྣམས་ལ་འཕྲིན་ཡིག་བཏང་ནས་གདན་འདྲེན་པར་མཛད། སྐབས་དེ་དུས་ཁོང་གི་སློབ་མ་གཙོ་བོ་ཁུ་སྟོན་བརྩོན་འགྲུས་སེངྒེ་ཡིས་མཇལ། ཇོ་བོ་རྗེ་དགུང་ལོ་ ༦༦ སྟེ་སྤྱི་ལོ་ ༡༠༤༧ ལོར་བསམ་ཡས་ལ་ཕེབས་ནས་དེ་ལ་བཞུགས་དུས་བླ་མ་དུ་མ་ཞིག་ཕེབས་ནས་ཆོས་གསན་པ་བྱུང་བ་སོགས་དབུས་གཙང་ལ་ཇོ་བོ་རྗེའི་སློབ་མ་ཁུ་སྟོན་དང་འབྲོམ་སྟོན་པ་གཉིས་ཀྱི་འབྲེལ་ལམ་དང་གནས་སྟངས་སྐོར་ཤིན་ཏུ་ཞིབ་རྒྱས་གསུངས།

སླར་བསམ་ཡས་ཕེབས་པའི་སྐབས་སུ་ལེགས་སྦྱར་གྱི་རྒྱ་དཔེ་དང་ལྷག་པར་དུ་གསང་སྔགས་རྒྱ་དཔེ་དུ་མ་གཟིགས་པ་ན། ཁོང་གི་ཞལ་ནས། སྔོན་མ་ཡིན་ན་ངས་རྒྱུད་སྡེ་ཐམས་ཅད་མཇལ་ཡིན་བསམ་བྱུང་། དེ་འདྲ་མིནཔར་རྒྱུད་སྡེ་ནི་རྒྱ་མཚོ་ལྟ་བུ་ཡིན་འདུག སྔར་རྒྱ་གར་ལ་མེ་སྲེག་ཐེངས་གསུམ་བྱུང་བས་རྒྱ་གར་ལ་མེད་པའི་གསུང་རབ་དུ་མ་མཇལ་རྒྱུ་འདུག་ཅེས་གསུངས་ནས། སློབ་མ་རྣམས་ལ་བཀའ་གནང་སྟེ་རྒྱ་གར་ལ་མེད་པའི་མ་དཔེ་འགའ་དཔེ་བཤུས་བྱས་ཏེ་རྒྱ་གར་ལ་བསྐུར། དེའི་རྗེས་སུ་ལྷ་ས་ལ་ཕེབས་ནས་རྔོག་ལེགས་པའི་ཤེས་རབ་ཀྱིས་མཇལ་བའི་སྐོར་རྣམས་ལེགས་པར་གསུངས།

ཇོ་བོ་རྗེ་ཡིས་དགོངས་གཞི་ལ་ཕལ་ཆེ་པའི་སྡེ་པའི་ནང་ཆང་ཏོག་ཙམ་གུ་ཡང་ཡོད་པས་བོད་ལ་ཕལ་ཆེན་སྡེ་པའི་སྡོམ་རྒྱུན་སྤེལ་བར་དགོངས་ཚེ། འབྲོམ་སྟོན་པས་སྔར་ཆོས་རྒྱལ་རྣམས་ཀྱིས་སྡོམ་རྒྱུན་སྡེ་པ་གཞན་སྤེལ་མི་ཆོག་པ་དང་། རྒྱ་གར་ལ་སྡེ་པ་མང་པོ་བྱུང་ནས་ཕན་ཚུན་མི་མཐུན་པ་མང་དུ་བྱུང་བ་སོགས་ལ་དགོངས་ནས་བཀག་འགོག་བྱས། ཡང་གསང་སྔགས་ཀྱི་ཆོས་གསུང་འགོ་བཙུགས་པ་ན་ཡང་འབྲོམ་སྟོན་པས་བཀག་པས་མཐར་ཇོ་བོ་རྗེ་ཐུགས་ཕམ། སྐུ་ཚེ་སྨད་ལ་ཆོས་དེ་ཙམ་མི་གསུངས་པར་མགུར་འཐེན་ནས་བཞུགས། སྐབས་རེ་བོད་ཀྱི་རི་དང་ཐང་ལ་སོགས་པ་གཟིགས་མོ་མཛད། སྐབས་རེ་དང་རྟ་དང་ར་ལ་སོགས་པ་ལའང་རྟ་ཡི་བུ་ཆུང་སྐུ་ཁམས་བདེ་ལགས་སམ། ཞེས་པ་སོགས་ཐུགས་བརྩེ་ཆེན་པོས་མཚམས་འདྲི་གནང་གི་ཡོད་པ་དང་། དམིགས་བསལ་གྱིས་ཇོ་བོ་རྗེས་བོད་ཀྱི་ཆུ་ཤིན་ཏུ་གཙང་ལ་ཞིམ་པ་སོགས་རྒྱ་གར་དང་མི་འདྲ་བའི་ཁྱད་ཆོས་དུ་མ་གཟིགས་ཏེ་དུས་རྟག་ཏུ་ཆུ་མཆོད་ཕུལ་གྱི་ཡོད། ད་ལྟ་བོད་བརྒྱུད་ནང་བསྟན་ལ་ཡོན་ཆབ་འབུལ་བའི་ལུགས་སྲོལ་དེ་ཡང་གཙོ་བོ་ཇོ་བོ་རྗེའིབཀའ་དྲིན་ལ་བརྟེན་ནས་བྱུང་བའི་སྐོར་སོགས་གསུངས།

སྐུ་ཚེ་མཐའ་མ་མྱ་ངན་ལས་འདས་པའི་ཚེ་སློབ་མ་རྣམས་རེ་རེ་བཞིན་བཀའ་སློབ་ལམ་སྟོན་གནང་ཞིང་། མ་འོངས་པར་ང་མེད་པའི་སྐབས་བླ་མ་འབྲོམ་སྟོན་པ་ལ་བསྟེན་དགོས་པའི་བཀའ་གནང་། དམིགས་བསལ་གྱི་འབྲོམ་སྟོན་པ་ལ་མངོན་ཤེས་མ་སྐྱེས་ཀྱི་བར་འགྲོ་དོན་མ་བྱེད། བསྟན་པ་གཞི་མ་དགེ་འདུན་ཡིན་པས་མ་འོངས་པར་དགེ་འདུན་པ་གང་མང་མང་གསོ་སྐྱོང་བྱེད་དགོས་པའི་བཀའ་གནང་བ་དང་། མྱ་ངན་ལས་འདས་རྗེས་སྐུ་གདུང་ནི་མདོ་མྱང་འདས་ནང་ལ་ཇི་ལྟར་གསུངས་པ་བཞིན་བྱ་དགོས་པ་དང་། ཇོ་བོ་རྗེ་དགུང་གྲངས་ ༧༣ སྤྱི་ལོ་ ༡༠༥༤ ལོར་དགོངས་པ་མྱ་ངན་ལས་འདས། ཁུ་སྟོན་གྱིས་གདུང་ཐལ་དེ་སྤར་བ་ཁང་ཁྱེར་ནས་ཚ་ཚ་མང་དུ་བཟོས་ཏེ་བོད་ཀྱི་ས་ཕྱོགས་གང་སར་བཞག་གནང་། དེ་ཡིས་བཀའ་དྲིན་ལ་བརྟེན་ནས་བོད་ཀྱི་ས་ཆ་གང་ཤར་ཇོ་བོ་རྗེའི་རིང་སྲེལ་གྱིས་ཁྱབ་པ་བྱུང་བ་སོགས་སྐུ་མྱ་ངན་ལས་པའི་སྐོར་རྣམས་གསུངས།

ཇོ་བོ་རྗེའི་ཤུགས་རྐྱེན་ནི།
ཕལ་ཆེན་པའི་སྡོམ་པའི་རྒྱུན་སྤེལ་མ་ཐུབ་ཀྱང་འདུལ་བའི་བསྟན་པ་ལ་རྩལ་འདོན་གནང་ནས་བོད་ཀྱི་ཆོས་བརྒྱུད་ཐམས་ཅད་རབ་བྱུང་གི་སྡེ་ལ་གཙོ་བོར་འཛིན་པ་བྱུང་བ་ཡིན། དེ་བཞིན་དགེ་ཤེས་སོགས་མི་ཆེན་ཡིན་ཟེར་བ་སྐྱབས་འགྲོའི་གོ་བ་ལེགས་པར་མེད་པར་དགོངས་ནས་སྐྱབས་འགྲོ་རྩལ་འདོན་གནང་། ད་ལྟ་ང་ཚོ་ཆོས་ཚིག་བཞི་མ་གཏོགས་མི་འདོན་ནའང་འགོ་ལ་སྐྱབས་འགྲོ་འདོན་པའི་སྲོལ་བྱུང་། དེ་བཞིན་བོད་ནང་ལ་སེམས་བསྐྱེད། ལས་རྒྱུ་འབྲས། བསྔོ་བ་སྨོན་ལམ་མཛད་རྒྱུ་རྣམས་དང་། སྡོམ་པ་གནང་བའི་སྐབས་སུ་ཟབ་མོ་ལྟ་བརྒྱུད་སྡོམ་རྒྱུན་དང་། ཐལ་འགྱུར་བའི་ལྟ་གྲུབ་དང་། ཤེར་ཕྱིན་གྱི་བཤད་པ་དང་། རྒྱུད་བླ་མ་ཐོག་མར་གསུང་མཁན་དང་། ཆོ་གའི་སྐབས་ལ་མདོ་ཆོག་སྨན་ཆོག་སོགས་དང་། གནས་བརྟན་བཅུ་དྲུག་གི་ཆོ་ག། །རྗེ་བཙུན་སྒྲོལ་མའི་ཆོས་སྐོར་རྒྱ་ཆེར་དར་བ་དང་། དེ་བཞིན་གདན་ས་གསང་ཕུ་དང་། སྣར་ཐང་སོགས་ཀྱི་ཆོས་གྲྭ་རྣམས་ཇོ་བོ་རྗེའི་བཀའ་དྲིན་ལ་བརྟེན་ནས་བྱུང་བའི་ཚུལ་ཞིབ་པར་གསུངས།

དྭགས་པོ་བཀའ་བརྒྱུད་ལ་ཕྱོགས་ལ་གཞིག་ན། ཕྱོགས་གཅིག་ནས་གཞིག་ན་དྭགས་པོ་བཀའ་བརྒྱུད་པ་ནི་བཀའ་གདམས་པའི་བརྒྱུད་པ་འཛིན་པ་ཡིན་པ་དང་། དེ་ཡང་རྗེ་སྒམ་པོ་པ་སོགས་བཀའ་བརྒྱུད་གོང་མ་རྣམས་ཀྱིས་གདམས་པ་དང་མན་ངག་དུ་མ་ཞིག་ཇོ་བོ་རྗེས་ལས་བརྒྱུད་པའི་ཚུལ་དང་། དེ་བཞིན་ས་དགེ་བཀའ་རྙིང་རིས་སུ་མ་ཆད་པའི་ཆོས་བརྒྱུད་ཚང་མ་ལ་བཀའ་དྲིན་གྱིས་མ་ཁྱབ་པ་མེད་པས། ཁོང་གི་བཀའ་དྲིན་དེ་ང་ཚོས་བསམ་ཤེས་བྱེད་ཐུབ་པ་དགོས་པའི་ཚུལ་སོགས་ཞིབ་ཁྲིད་མཛད།

ད་ལན་བཀའ་བརྒྱུད་སྨོན་ལམ་ཐེངས་ ༣༩ པའི་སྐབསཉིན་གསུམ་གྱི་རིང་ལ། ༧རྒྱལ་དབང་ཡིད་བཞིན་ནོར་བུ་མཆོག་ནས་ཐད་གཏོང་དྲ་རྒྱ་བརྒྱུད་དེ་སྨོན་ལམ་ཚོགས་བཅར་བ་སྐྱ་སེར་སྟོང་ཕྲག་དུ་མ་ལ་བོད་ཀྱི་ནང་བསྟན་ལ་ཆེས་ཤིན་ཏུ་བཀའ་དྲིན་ཆེ་བའི་མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་བཀའ་ཆོས་ཟབ་རྒྱས་བཀའ་ཁྲིད་བསྩལ་བར་མཛད། མཐར་འདུས་པ་ཡོངས་ནས་ལམ་རིམ་སྨོན་ལམ་གསུང་རྗེས་༧རྒྱལ་དབང་ཡིད་བཞིན་ནོར་བུ་ནས་གསོན་ཤིན་གཉིས་ཀྱི་བསྔོ་སྨོན་གནང་། དེའི་རྗེས་སུ་ཉིན་གུང་དགུང་ཚིགས་ལ་རོལ།

ཉིན་རྒྱབ་ཆུ་ཚོད་དང་པོའི་ཐོག་སླར་ཡང་འདུས་པ་ཡོངས་ནས་སྤྱིར་སྨོན་ལམ་གྱི་མཛད་རིམ་གཞིར་བཟུང་གི་ཞལ་འདོན་གནང་ཞིང་། དམིགས་བསལ་དུ་ཉིན་འདིར་བསྟན་འགྲོ་བདེ་རིམ་ལ་དམིགས་ནས་རྗེ་བཙུན་འཕགས་མ་སྒྲོལ་མར་གསོལ་བ་འདེབས་པ་སྒྲོལ་མ་ཉི་ཤུ་རྩ་གཅིག་གི་བསྟོད་པ་གྲངས་གསོག་དང་། ཞི་བར་གཤེགས་པ་༧སྐྱབས་རྗེ་ཡོངས་འཛིན་ཁྲ་འགུ་རིན་པོ་ཆེ་མཆོག་གི་ཡང་སྲིད་མྱུར་འབྱོར་གྱི་གསོལ་འདེབས་༧རྒྱལ་དབང་ཀརྨ་པས་ལྗགས་རྩོམ་གནང་བ་དེ་ཉིད་ཚར་གྲངས་འགའ་འདོན་གནང་། དེ་ཡི་རྗེས་སུ་ནམ་རྒྱུན་སྨོན་ལམ་ཞལ་འདོན་ལྟར་གསུང་ནས་བཀའ་བརྒྱུད་སྨོན་ལམ་ཉིན་བཞི་པ་ལེགས་པར་གྲུབ་བོ།

གནས་ཚུལ་རགས་བསྡུས་ཤིག་གུས་གངས་ལ་ཉི་ཤར་ནས་བྲིས།

སྤྱི་ཚེས་༧ ཏེ། དེ་རིང་གི་ཉིན་མོ་༧དཔལ་རྒྱལ་བའི་དབང་པོ་སངས་རྒྱས་ཀརྨ་པ་མཆོག་གི་དྲྭ་ལམ་བརྒྱུད་ནས་བཀའ་བརྒྱུད་སྨོན་ལམ་ཆེན་མོ་ཉིན་གསུམ་པའི་གསུང་ཆོས་གནང་སོང་། ཐེངས་དེའི་གསུང་ཆོས་ནི་ཇོ་བོ་རྗེ་དཔལ་ལྡན་ཨ་ཏི་ཤ་ཡི་རྣམ་ཐར་ཡིན་པ་རེད། ཐོག་མར་རྒྱལ་དབང་མཆོག་གི་བཞུགས་ཁྲིར་གཏེར་སྒར་འདུས་སྤྱི་དང་བླ་མ་ཚེ་མཐར་གཙོས་པའི་སྦྱིན་བདག་རྣམ་པས་མཎྜལ་རྟེན་གསུམ་འདེགས་འབུལ་དང་འདུ་མང་ནས་མཎྡལ་དབྱངས་སུ་གྱེར་ནས་ཕུལ་གྲུབ་རྗེས། གསོལ་འདེབས་འདོན་རྟ་དབྱངས་སུ་གྱེར། དེའི་རྗེས་རྒྱལ་དབང་མཆོག་ནས་སྨོན་ལམ་ཆེན་མོར་ཆིབས་བསྒྱུར་གནང་བའི་མཆོག་སྤྲུལ་རྣམ་པ་དང་མཁན་སློབ་དགེ་བའི་བཤེས་གཉེན་རྣམ་པ་ཚང་མར་འཚམས་འདྲི་བཅས་གནང་ནས་གསུང་ཆོས་སྔ་མའི་འཕྲོ་གནང་དབུ་འཛུགས་སོང་། དེ་ཡང་ཇོ་བོ་རྗེ་ནི་བོད་ལ་མ་ཕེབས་པའི་སྔོན་ནས་རྒྱ་གར་ལ་དེ་དུས་གྲགས་ཆེ་བའི་སྡེ་པ་བཞི་ཀས་བླ་མར་བཀུར་གྱི་ཡོད་པ་དང་མཚན་སྙན་གྲགས་པའི་མཁས་པ་ཞིག་ཡིན་པ། མཛད་ཕྲིན་ཡིན་ནའང་དར་རྒྱས་ཆེན་པོ་བྱུང་མྱོང་བ་ཞིག་རེད་ཅེས་གསུང་གནང་སོང་།

ད་རེ་གསུང་ཆོས་སྐབས་ཀྱི་སྙིང་དོན་གསུམ། ཇོ་བོ་རྗེ་བོད་དུ་གདན་འདྲེན་ཚུལ་སྐོར་དང་། རྒྱུ་མཚན་གང་ལ་བརྟེན་ནས། རྐྱེན་གང་ཞིག་ལ་བརྟེན་ནས་གདན་འདྲེན་ཞུ་ཐུབ་པ་ཡིན་ཚུལ་དང་། དེའི་ལོ་རྒྱུས་རྒྱབ་ལྗོངས་བཅས་ཀྱི་སྐོར་གསུངས་གནང་སོང་། དང་པོ་རྒྱབ་ལྗོངས་ལོ་རྒྱུས་ནི། སྐབས་དེ་དུས་བོད་ཀྱི་ཁྱབ་སྲིད་ཆོས་ལུགས་ཀྱི་གནས་སྟངས་ཉག་ཕྲ་བོ་འདྲ་ཡིན་ས་རེད། བོད་ལ་དུས་རབ་བདུན་པ་བོད་རྒྱལ་སྲོང་བཙན་སྐབས་ནས་རྒྱལ་བསྟན་དར་ཡ་དབུ་བཙུགས་པ་དང་། བོད་རྒྱལ་ཁྲི་སྲོང་ལྡེའུ་བཙན་སྐབས་ལ་སངས་རྒྱས་བསྟན་པ་རྒྱ་ཆེར་དར་རྒྱས་བྱུང་བ་རེད། དེའི་རྗེས་ཀྱི་མི་རབས་བཞི་པ་དར་མ་འུ་དུམ་བཙན་པོས་སྤྱི་ལོ་༨༤༡་ལོར་སངས་རྒྱས་བསྟན་པ་སྣུབ་པ་རེད། སྔར་མེས་དབོན་རྣམ་གསུམ་སྐབས་སུ་དར་རྒྱས་ཆེ་བའི་རྒྱལ་བའི་བསྟན་པ་འདི་ཉམས་པ་རེད། དར་མ་ལ་སྲས་གཉིས་འོད་སྲུང་དང་ཡུམ་བརྟན། དེའི་ནང་ནས་འོད་སྲུང་གི་ཚ་བོ་སྐྱིད་ལྡེ་ཉི་མ་མགོན་ཟེར་བ་ཞིག་བྱུང་བ་རེད། ཁོང་དབུས་གཙང་གི་ཁུལ་ལ་བཞུགས་མ་ཐུབ་ནས་མངའ་རིས་ཕྱོགས་ལ་ཕེབས་དེར་ཁོང་རྒྱལ་པོར་ཆགས་པ་རེད་ཁོང་ལ་སྲས་གསུམ་ཡོད་པས་ནང་འཁྲུག་ཤོར་དོགས་ནས་ཁོང་རང་གི་མངའ་འོག་ཏུ་ཡོད་པའི་མངའ་རིས་རྒྱལ་ཁབ་འདི་དུམ་བུ་གསུམ་དུ་བགོས་ནས་རེ་རེ་སྤྲད། མངའ་རི་སྐོར་གསུམ་ཞེས་གྲགས་པའང་དེ་སྐབས་ནས་བྱུང་བ་དང་གུ་གེ་རྒྱལ་རབས་ཡང་འདི་ནས་མཆེད་པར་གསུང་གནང་སོང་། ཁོང་གི་སྲས་གཉིས་པ་བཀྲིས་ལྡེ་མགོན་ལ་སྲས་གཉིས་ཆེ་བ་སྲོང་ངེ་ཟེར་ཞིང་། རབ་ཏུ་བྱུང་བའི་མཚན་ལ་ལྷ་བླ་མ་ཡེ་ཤེས་འོད། ལྷ་ཞེས་པ་རྒྱལ་པོ་དང་ཕྱིས་སུ་བླ་མར་ཆགས་པའི་རྒྱུ་མཚན་གྱི་ལྷ་བླ་མ་ཟེར་བ་རེད། ལྷ་བླ་མ་ཡེ་ཤེས་འོད་ཁོང་བོད་ཀྱི་ལོ་རྒྱུས་ཐོག་ལ་བྱས་རྗེས་ཆེན་པོ་རེད། དང་པོ། བསྟན་པ་སྟོད་ནས་དར་བར་བྱེད་པ་དང་། གཉིས་པ། ཇོ་བོ་བོད་ལ་གདན་འདྲེན་ཞུ་བ། གསུམ་པ། ལོ་ཙྭ་བ་རིན་ཆེན་བཟང་པོ་ལ་སོགས་པ་མང་པོ་ཞིག་སྐྱེད་སྲིང་གནང་བཅས་ནས་གསང་སྔགས་གསར་མ་ལ་སོགས་པའི་དམ་ཆོས་མང་པོ་བོད་སྐད་དུ་བསྒྱུར་གནང་བཅུག་པ་འདི་རེད། སྤྱིར་བཏང་ལྷ་བླ་མ་ཁོང་གླང་དར་མའི་བསྟན་པ་སྣུབ་རྗེས་མི་ལོ་བརྒྱ་ཕྲག་གཅིག་ཙམ་གྱི་རྗེས་སུ་བྱུང་བ་དང་། དེ་སྐབས་སུ་གང་ཅིའི་ཐོག་ནས་བསྟན་པའི་གནས་ཚད་དམའ་རུ་ཕྱིན་པ་ཙམ་མ་ཟད། རྒྱ་གར་ནས་ཡིན་ནའང་གསེར་ལ་བརྔམས་པའི་པཎྜི་ཏ་མང་པོ་ཕེབས་ཀྱི་ཡོད་པ་དང་། ཆོས་ལོག་ལྟ་སྤྱོད་འཁྲུལ་པ་ལོག་པ་བརྫུན་མ་ལོག་པར་བཤད་པ་ཡང་དེ་དུས་བྱུང་དང་འབྱུང་བཞིན་པའི་སྐབས་སུ། རྒྱུ་མཚན་དེ་དག་ལ་བརྟེན་ནས་རྒྱལ་པོས་བཀའ་དཔེ་རྣམས་ལ་གཟིགས་ཡོང་དུས་ཆོས་དང་མཐུན་པ་ཞིག་རེད་མིན་འདུག་བསམ་ནས་སྔགས་ལོགས་སུན་འབྱིན་བརྩམས་པ་དང་ཁྲིམས་དང་སྒྲིག་གཞི་མང་པོ་བཟོ་གནང་འདུག དེ་བཞིན་རྒྱ་གར་ནས་ཀྱང་ཚད་ལྡན་གྱི་ནང་པའི་པཎྜི་ཏ་མཁས་པ་ཆེན་པོ་རྣམ་གདན་འདྲེན་ཞུས་རྒྱུའི་དམིགས་ཡུལ་རྒྱུ་མཚན་གཙོ་བོ་དེ་ཡིན་པ་རེད་འདུག་ཅེས་གསུངས་སོང་།

ཇོ་བོ་བོད་ལ་གདན་འདྲེན་ཚུལ་ལ།
རྐྱེན་གང་ཞིག་ལ་བརྟེན་ནས་ཇོ་བོ་བོད་ལ་གདན་འདྲེན་ཞུ་ཐུབ་པ་ཡིན་ཚུལ་འདི་ཁོང་གི་བྱས་རྗེས་གཉིས་པ་འདྲ་བོ་ཞིག་ཆགས་ཡོད་རེད། བོད་ལ་ཀུན་གྱི་བཀུར་བའི་བླ་མ་ཞིག་མེད་པ་དང་ཆོས་ཀྱི་བྱུངས་ཁུངས་རྒྱ་གར་ཡིན་པ་དང་བོད་མི་ཀུན་གྱི་བཀུར་འོས་པ་ཞིག་གདན་དགོས་པ་དང་མདོ་སྔགས་གཉིས་ཀར་མཁས་པ་ཀུན་སྤྱོད་བཟང་པོ་ཡོད་པ། བསྟན་པ་དག་ཐེར་བྱེད་པ་ལ་ལྷག་པའི་བསམ་པ་ཡང་གལ་ཆེན་ནང་གི་དོན་ཆེན་གཅིག་ཡིན་པས་སྐབས་དེ་དུས་བླ་མ་ཡོན་ཏན་ཆ་ཚང་བ་འཛོམས་སྡོད་པ་ཁོང་མ་གཏོགས་མེད་པ་ལྟ་བུ་ཆགས་ཡོད། གདན་འདྲེན་ཡ་ཐོག་མའི་འཆར་གཞི་འགོད་མཁན་འདི་ལྷ་བླ་མ་ཡིན་ཀྱང་ཐུགས་འདུན་ལྟར་མ་གྲུབ། དངོས་སུ་གདན་དྲངས་མཁན་ནི་བྱང་ཆུབ་འོད་ཡིན་པར་གསུང་གནང་སོང་། །

ཇོ་བོ་བོད་ལ་ཕེབས་ཐང་ཕེབས་ལུགས། སྐབས་དེ་དུས་ལོ་ཙྭ་བ་རྒྱ་བརྩོན་འགྲུས་སེངྒེ་ལ་ལྷ་བླ་ཡེ་ཤེས་འོད་ཀྱིས་རྒྱ་གར་དུ་ཇོ་བོ་བོད་ལ་གདན་འདྲེན་པར་མངགས་ཀྱང་གདན་འདྲེན་ཞུས་མ་ཐུབ། དུས་ཚོད་རིང་པོ་མ་སོང་གོང་ལྷ་བླ་མ་དགོངས་པ་རྫོགས་དགོངས་པ་རྫོགས་ཁར་ཁོང་གི་ཚ་བོ་བྱང་ཆུབ་འོད་ལ་ཨ་ཏི་ཤ་ངེས་པར་དུ་བོད་ལ་གདན་འདྲེན་དགོས་ཚུལ་ཁ་ཆེམས་བཞག་གནང་། ཁ་ཆེམས་དེ་བཞིན་བྱང་ཆུབ་འོད་ཀྱིས་ཀྱང་ཁུ་བོས་ཐུགས་དགོངས་རྫོགས་པའི་སླད་དུ། སློབ་མ་ནག་ཚོ་ལོ་ཙྭ་བ་གཙོས་པའི་འཁོར་སློབ་ཚོ་ལ་གསེར་མང་པོ་སྤྲད་དེ་ཇོ་བོ་བོད་ལ་གདན་འདྲེན་ཡ་ཆེད་རྒྱ་གར་ལ་བརྫངས། དེ་དུས་ཁོང་བི་ཀྲ་མ་ཤཱི་ལའི་གཙུག་ལག་ཁང་དུ་བཞུགས་ཡོད་རེད་ཟེར། རྒྱ་བརྩོན་འགྲུས་ཡང་དེར་སློབ་སྦྱོང་བྱེད་བཞིན་བཞུགས། ཁོང་གཉིས་པོས་ཇི་ལྟར་གདན་འདྲེན་ཞུ་རྒྱུའི་སྐོར་བགྲོས་བྱས་ནས། ཇོ་བོར་སྙན་གསན་ཕབ་ཇོ་བོས་ཀྱང་བོད་ཀྱི་རྒྱལ་པོ་བྱང་ཆུབ་སེམས་དཔའ་ཁོང་གི་བཀའ་དགོངས་ལྟར་འགྲུབ་དགོས་བསམས་ནས། རྗེ་བཙུན་སྒྲོལ་མ་ལ་ལུང་བསྟན་ཞུ་པ་ལྟར་རྗེ་བཙུན་སྒྲོལ་མས་ཀྱང་བོད་ལ་ཕེབས་ནས་བསྟན་འགྲོར་ལ་ཕན་ཐོག་འོང་ཚུལ་ལུང་བསྟན་བབས། དེ་བཞིན་བོད་ལ་ཕེབས་ན་བསྟན་འགྲོར་ཕན་ཐོག་ཆེན་པོ་འབྱུང་ན་ཡང་སྐུ་ཚེ་རིང་པོ་བཞུགས་ཀྱི་མ་རེད་ཅེས་པའི་ལུང་བསྟན་བབས་ན་ཡང་། རྒྱལ་བའི་བསྟན་པ་དང་འགྲོ་བའི་བདེ་སྐྱིད་ཀྱི་རྩ་ལག་ཁོ་ནའི་ཆེད་དུ་ཐབས་ཤེས་ཆེན་པོའི་ཐོག་བལ་ཡུལ་རྒྱུད་ནས་བོད་ལ་བཏེགས། དེ་སྐབས་ཕལ་ཆེར་ཁོང་དགུང་ལོ་༥༥་ཙམ་བཞེས་ཡོད་རེད་ཅེས་གསུང་སོང་། མཐར་སྤྱི་ལོ་༡༠༤༠ ལོར་མངའ་རིར་ཕེབས་ཐུབ་པ་བྱུང་བ་རེད་ཅེས་གསུངས་སོང་། བསུ་བ་ཡང་སྔར་དང་མ་འདྲ་བའི་གྲ་སྒྲིག་མཛད་ནས་བསུ་བ་གནང་ཡོད་པར་གྲགས། དེ་དུས་དུང་ཆེན་དམིགས་བསལ་ཞིག་བསུ་བའི་ཆེད་འབུད་པའི་སྲོལ་བཙུགས་དེ་ནས་བཟུང་དུང་ཆེན་དེའི་མིང་ལ་སློབ་སྤྱན་དྲངས་པའི་དུང་ཞེས་པ་ཞིག་ཀྱང་དེ་ནས་ཚུར་དར་བ་རེད་ཅེས་བཀའ་བསྩལ་གནང་སོང་། བོད་ལ་ཕེབས་ནས་དབུ་གཙང་ཁུལ་སོགས་སུ་འགྲོ་དོན་བསྐྱངས་ཚུལ་སོགས་སང་ཉིན་གྱི་བཤད་ཀྱི་ཡིན་ཅེས་ཆོས་ཐུན་གྲོལ་གནང་སོང་།
བཀའ་བརྒྱུད་སྨོན་ལམ་ཐེངས་སོ་དགུ་པའི་སྐབས་གནས་ཚུལ་ཕྱོགས་བསྡུས་པ་ཀརྨ་བསོ་རྒྱལ་པས། ༧/༠༢/༢༠༢༥